“പൊട്ടിത്തെറിക്കാൻ കോൺഗ്രസ് എന്നൊന്ന് ഇന്നില്ല. ജനങ്ങൾ എന്നേ ഇവരെ കുഴിച്ച്‌ മൂടി കഴിഞ്ഞു. ആകെ ഇനി ബാക്കിയുള്ളത്‌ നെഹ്രു പണ്ട്‌ ലീഗിനെ പറഞ്ഞത്‌ പോലെ കോൺഗ്രസ് എന്ന പേരുള്ള ഒരു”ചത്ത കുതിര”മാത്രമാണ്. അതിനെ കിനാവിൽ പറപ്പിക്കാൻ ശ്രമിക്കുന്ന കോൺഗ്രസ് നേതാക്കളും ചില മാധ്യമങ്ങളും ഒന്നും നടക്കില്ലെങ്കിലും അവരുടെ പണി ചെയ്യട്ടേ. നമ്മൾക്ക്‌ നല്ല കാഴ്ച്ചക്കാരാകാം.” അദ്ദേഹം പറഞ്ഞു. ഡിസിസി അധ്യക്ഷന്മാരുടെ പട്ടിക പുറത്തുവന്നതിനു പിന്നാലെ കോൺഗ്രസിൽ പൊട്ടിപ്പുറപ്പെട്ട കലാപത്തെ പരിഹസിച്ചാണ് രംഗത്തെത്തിയിരിക്കുന്നത്.
കോൺഗ്രസ് വലിയൊരു പൊട്ടിത്തെറിയിലേക്കാണ് പോകുന്നതെന്ന് സിപിഎം നേതാവും മുൻ മന്ത്രിയുമായ എ കെ ബാലൻ കഴിഞ്ഞ ദിവസം പറഞ്ഞിരുന്നു.
കെ സുധാകരൻ്റെ ശൈലി ഉൾക്കൊള്ളാൻ പറ്റുന്ന ഘടനയല്ല ഇന്ന് കോൺഗ്രസിനുള്ളത്. കോൺഗ്രസിൻ്റെ ഉള്ളിൽ ജനാധിപത്യപരമായി ചിന്തിക്കുന്ന നല്ല ഒരു വിഭാഗമുണ്ട്. അവർക്ക് ഉൾക്കൊള്ളാൻ പറ്റുന്ന രീതിയിലല്ല സുധാകരൻ്റെ സമീപനങ്ങൾ. സെമി കേഡർ പാർട്ടി എന്ന് പറഞ്ഞുകൊണ്ട് കോൺഗ്രസിനെ നയിക്കാൻ സാധിക്കില്ല. കാരണം ഗ്രൂപ്പില്ലാതെ കോൺഗ്രസിന് നിലനിൽപ്പില്ല. ഇക്കാര്യം കെ സി ജോസഫ് തന്നെ പറഞ്ഞിട്ടുണ്ട്. ഗ്രൂപ്പില്ലാത്ത കോൺഗ്രസിനെയാണ് സുധാകരൻ സ്വപ്നം കാണുന്നതെങ്കിൽ, ഇനി കോൺഗ്രസുണ്ടാകില്ല; പകരം ഗ്രൂപ്പുകൾ മാത്രമേ ഉണ്ടാകൂ. ഗ്രൂപ്പിന് അതീതമായി കോൺഗ്രസിനെ കേഡർ പാർട്ടി ആക്കി വളർത്താം എന്നത് കേവലം ദിവാസ്വപ്നമാണ്, ബാലൻ പറഞ്ഞു.
മുല്ലപ്പള്ളിക്കും സുധീരനും ഉണ്ടായ അനുഭവം സുധാകരനും ഉണ്ടാകും എന്നുള്ള ഓർമ്മപ്പെടുത്തൽ കോൺഗ്രസ് പ്രവർത്തകർ നടത്തിയിരിക്കയാണ്. അഭിപ്രായം പറഞ്ഞതിന് രണ്ട് മുതിർന്ന നേതാക്കൾക്കെതിരെ സസ്പെൻഷൻ നടപടി എടുത്തുകഴിഞ്ഞു. ഈ നടപടി സാമാന്യനീതിക്ക് നിരക്കുന്നതല്ലെന്ന് അവർ തന്നെ പറഞ്ഞിട്ടുണ്ട്. മാത്രമല്ല, ഉമ്മൻചാണ്ടിയെ പ്രകടമായി വെല്ലുവിളിക്കുന്ന സ്ഥിതിയും ഉണ്ടായി. ഉമ്മൻചാണ്ടിയേയും രമേശ് ചെന്നിത്തലയേയും പരുഷമായും പരസ്യമായും ശാസിക്കുകയാണ്. ഇതും കോൺഗ്രസിൻ്റെ ചരിത്രത്തിലില്ലാത്തതാണ്. സിപിഎമ്മിനോടും അതിൻ്റെ നേതാക്കളോടും കാട്ടുന്ന ശത്രുതാപരമായ സമീപനം തന്നെ കോൺഗ്രസിൻ്റെ പാരമ്പര്യമുള്ള നേതാക്കളോടും കെ സുധാകരൻ കാണിക്കുകയാണെന്നും എ കെ ബാലൻ വ്യക്തമാക്കി.
അതേസമയം, ഡിസിസി അധ്യക്ഷന്മാരെ നിയമിച്ചതുമായി ബന്ധപ്പെട്ട വിവാദങ്ങൾ പഴയ അധ്യായമാണെന്നാണ് കെ സുധാകരന്റെ പക്ഷം. “ഈ വിഷയവുമായി ബന്ധപ്പെട്ട് പാർട്ടിയുടെ എല്ലാ അഭിപ്രായങ്ങളും പ്രകടിപ്പിച്ചുകഴിഞ്ഞു. അത് പഴയ അധ്യായമാണ്. ഒന്നും ആവർത്തിക്കാൻ എനിക്ക് താൽപര്യമില്ല. പറയേണ്ടതിന് മറുപടി പറഞ്ഞു. പാർട്ടിയുടെ നിലപാട് എന്താണെന്ന് വ്യക്തമാക്കി. പിന്നോട്ടു പോയി അതേപ്പറ്റി ചർച്ചചെയ്യാനുള്ള താൽപര്യം ഞങ്ങൾക്കില്ല. ഇവിടെ വിഷയം അവസാനിപ്പിക്കണം. എല്ലാ ദിവസവും വിവാദ പരാമർശങ്ങളുമായി പാർട്ടിക്ക് മുന്നോട്ടു പോകാൻ സാധിക്കില്ല. പാർട്ടിയുടെ ഗുണത്തിനു വേണ്ടി അത്തരം ചർച്ചകളിലേക്ക് പോകാതിരിക്കാനാണ് ഞങ്ങളെടുത്ത തീരുമാനം. അതുകൊണ്ട് അത്തരം ചർച്ചകളൊക്കെ അവസാനിപ്പിച്ചിരിക്കുന്നു.” കെ സുധാകരൻ തിങ്കളാഴ്ച മാധ്യമങ്ങളോടു പറഞ്ഞു.
