കെ സുധാകരനുമായി നല്ല ആത്മബന്ധമാണ് ഉള്ളത്. രാജി വളരെ ആലോചിച്ചെടുത്ത തീരുമാനമാണ്. കോൺഗ്രസിനെ നശിപ്പിക്കാൻ നടത്തുന്ന നീക്കമല്ല ഇത്. പെരിങ്ങോട്ടുകുറിശിയിലെ ഭരണം തുടരുമെന്നും അതിന് സിപിഎം പിന്തുണ ആവശ്യമില്ലെന്നും ഗോപിനാഥ് പറഞ്ഞു. റിപ്പോർട്ടർ ടിവിയുടെ പരിപാടിക്കിടെയായിരുന്നു പരാമർശം.
അതേസമയം, എ വി ഗോപിനാഥിന്രെ സിപിഎം പ്രവേശനം സംബന്ധിച്ച് സിപിഎം പാലക്കാട് ജില്ലാ സെക്രട്ടറി സി കെ രാജേന്ദ്രൻ നിലപാട് വ്യക്തമാക്കി. സിപിഎമ്മിലേക്ക് വരണമോയെന്ന് അദ്ദേഹമാണ് തീരുമാനിക്കേണ്ടത്. ഇടതുപക്ഷ രാഷ്ട്രീയത്തെക്കുറിച്ച് അദ്ദേഹത്തിന് നല്ലതുപോലെ അറിയാം. അദ്ദേഹം നിലപാട് പ്രഖ്യാപിച്ച ശേഷം സിപിഎം നിലപാട് പറയുന്നതാണ് ശരി. മറ്റുകാര്യങ്ങൾ സംസ്ഥാന നേതൃത്വം തീരുമാനിക്കും- രാജേന്ദ്രൻ പറഞ്ഞു.
ഗോപിനാഥിനെപ്പോലെ നിരവധി നേതാക്കൾ കോൺഗ്രസ് വിടുമെന്ന് സിപിഎം നേതാവും മുൻ മന്ത്രിയുമായ എ കെ ബാലൻ പറഞ്ഞു. ഗോപിനാഥ് മുഖ്യമന്ത്രിയെ അഭിനന്ദിച്ചതാണ് കോൺഗ്രസ് നേതാക്കളെ പ്രകോപിപ്പിച്ചത്. ഇടതുപക്ഷത്തേക്ക് വരുന്ന കാര്യം ഗോപിനാഥ് പ്രഖ്യാപിച്ചാൽ അതിനു ശേഷം ഉചിതമായ തീരുമാനം കൈക്കൊള്ളുമെന്ന് ബാലൻ പറഞ്ഞു.
അതേസമയം, കോൺഗ്രസിൽ നിന്നും രാജിവെച്ച എ വി ഗോപിനാഥിന്റെ തീരുമാനം സ്വാഗതാർഹമാണെന്ന് സിപിഎം വ്യക്തമാക്കി. ഏറ്റവും കാലോചിതമായ ഒരു തീരുമാനം എടുത്ത ഗോപിനാഥിന്റെ മാതൃക ഇനിയും നിരവധി കോണ്‍ഗ്രസ്സ് നേതാക്കള്‍ സ്വീകരിക്കുമെന്നാണ് മനസ്സിലാക്കുന്നത്. സിപിഎം പാലക്കാട് ജില്ലാ കമ്മിറ്റി വാർത്താ കുറിപ്പിൽ പറയുന്നു.
ഒരു കോണ്‍ഗ്രസ്സ് പ്രവര്‍ത്തകനെന്ന നിലയില്‍ കോണ്‍ഗ്രസ്സിന്‍റെ രാഷ്ട്രീയ കാഴ്ചപ്പാടുകള്‍ നടപ്പിലാക്കുന്നതിന് ആത്മാര്‍ത്ഥതയോടുകൂടി പ്രവര്‍ത്തിച്ച ഒരു നേതാവായിരുന്നു അദ്ദേഹം. തന്‍റെ നിലപാടുകളില്‍ ഉറച്ചുനിന്നതുകൊണ്ടും കോണ്‍ഗ്രസ്സിന്‍റെ പൊളിഞ്ഞു കൊണ്ടിരിക്കുന്ന രാഷ്ട്രീയത്തെ തുറന്നുകാണിച്ചതുകൊണ്ടും കോണ്‍ഗ്രസ്സില്‍ അനഭിമതനായി മാറേണ്ടിവന്നു എന്നതാണ് അദ്ദേഹത്തിന്‍റെ വാർത്താ സമ്മേളനത്തില്‍ നിന്നും മനസ്സിലാക്കുന്നത്.
ജനതാല്‍പ്പര്യമോ സാമൂഹ്യ പ്രതിബദ്ധതയോ ഇല്ലാത്ത ഒരു ആള്‍ക്കൂട്ടമായി കോണ്‍ഗ്രസ്സ് മാറികഴിഞ്ഞു. തകര്‍ന്നു കൊണ്ടിരിക്കുന്ന കോണ്‍ഗ്രസ്സ് കപ്പലില്‍ നിന്ന് കപ്പിത്താന്‍ ആദ്യം തന്നെ കടലില്‍ ചാടി രക്ഷപ്പെട്ടു. കപ്പിത്താനില്ലാത്ത ഈ കപ്പലില്‍ നിന്ന് സ്വയം നീന്തി രക്ഷപ്പെടാന്‍ കോണ്‍ഗ്രസ്സിന് വേണ്ടി ദീര്‍ഘകാലം ത്യാഗപൂര്‍ണമായ പ്രവര്‍ത്തനം നടത്തിയ പലരും ശ്രമിച്ചുകൊണ്ടിരിക്കുകയാണ്- പാലക്കാട് ജില്ലാ കമ്മിറ്റി വാർത്താക്കുറിപ്പിൽ വ്യക്തമാക്കി.
ഡിസിസി പട്ടികയുമായി ബന്ധപ്പെട്ട് എ, ഐ ഗ്രൂപ്പ് നേതാക്കളും കെപിസിസി നേതൃത്വവും തമ്മിൽ പരസ്യമായ പോരിലേയ്ക്ക് കടക്കുന്നതിനിടെയാണ് എ വി ഗോപിനാഥിൻ്റെ രാജി. മുൻപ് പെരിങ്ങോട്ടുകുറുശി പഞ്ചായത്ത് പ്രസിഡൻ്റായിരുന്ന ഗോപിനാഥ് ആലത്തൂര്‍ എംഎൽഎയുമായിരുന്നു.
