മുന്‍പ് പല കെപിസിസി പ്രസിഡന്‍റുമാര്‍ക്കെതിരേയും സുധാകരന്‍ നടത്തിയ വിമര്‍ശനങ്ങള്‍, എംഎല്‍എ മാത്രമായിരുന്നപ്പോള്‍ പാര്‍ട്ടി നേതാക്കള്‍ പ്രതിപക്ഷ നേതാവ്, മുഖ്യമന്ത്രി എന്നിവര്‍ക്കെതിരെ സതീശന്‍ നടത്തിയിട്ടുള്ള വിമര്‍ശനങ്ങള്‍ എന്നിവയിലുണ്ടായ അച്ചടക്കരാഹിത്യം തനിക്ക് ഉണ്ടായിട്ടില്ലെന്നും അനില്‍കുമാര്‍ പറയുന്നു. തന്നെക്കാൾ രൂക്ഷമായ ഭാഷയിൽ വിമർശനം ഉന്നയിച്ച ഉമ്മൻ ചാണ്ടിയെ സസ്പെൻഡ് ചെയ്യുമോയെന്നും അനിൽകുമാർ വാർത്താ സമ്മേളനത്തിൽ ചോദിച്ചു.
Also Read :
ഗ്രൂപ്പിസം അവസാനിക്കുമെന്ന് പറഞ്ഞ പുതിയ നേതൃത്വം പഴയതിനേക്കാൾ മോശമായാണ് കാര്യങ്ങൾ കൈകാര്യം ചെയ്യുന്നത്. ഗ്രൂപ്പിന്‍റെ ഭാഗമല്ലാത്ത ഒരാളേപ്പോലും പുതിയ പട്ടികയില്‍ കാണിക്കാന്‍ കഴിയില്ലെന്നും അനിൽകുമാർ പറഞ്ഞു. യാഥാർഥ്യം വിളിച്ച് പറയുന്നത് എങ്ങനെയാണ് അച്ചടക്കലംഘനമാകുന്നതെന്നും അദ്ദേഹം ചോദിച്ചു.
തന്നെ സസ്പെൻഡ് ചെയ്തത് പാർട്ടിയുടെ പ്രാഥമിക അംഗത്വത്തിൽ നിന്നാണോ ഏതെങ്കിലും ഫോറത്തിൽ നിന്നാണോയെന്നും അനിൽകുമാർ ചോദിച്ചു. കെപിസിസി സംഘടനാ ചുമതലയുള്ള ജനറല്‍ സെക്രട്ടറിയും എഐസിസി അംഗവുമായ തന്നെ ആരാണ്, ഏത് ഫോറത്തില്‍ നിന്നാണ് സസ്‌പെന്‍ഡ് ചെയ്തതെന്നാണ് ചോദ്യം. വിശദീകരണം ചോദിക്കാതെ എങ്ങനെയാണ് സസ്പെൻഡ് ചെയ്യാനാവുകയെന്നും അദ്ദേഹം ചോദിക്കുന്നു.
Also Read :
ഫോണിൽ പോലും വിളിച്ച് വിശദീകരണം ചോദിക്കാതെയാണ് നടപടിയെന്നും വിഷയം ചൂണ്ടിക്കാണിച്ച് നാളെ എഐസിസിക്ക് പരാതി നല്‍കുമെന്നും അനിൽകുമാർ പറഞ്ഞു. ഇന്നലെ ഡിസിസി അധ്യക്ഷ പ്രഖ്യാപനം വന്നതിന് പിന്നാലെയായിരുന്നു അനിൽകുമാർ പട്ടികയ്ക്കെതിരെ വിമർശനം നടത്തിയത്. വിഡി സതീശനും കെ സുധാകരനും എതിരായിരുന്നു വിമർശനം. ഗ്രൂപ്പ് പരിഗണിക്കില്ലെന്നാണ് സതീശനും സുധാകരനും പറഞ്ഞത്. എന്നാൽ പുറത്തുവന്ന പട്ടികയിലെ 14 പേരും ഗ്രൂപ്പുകാരാണെന്നും പുനഃപരിശോധിച്ചില്ലെങ്കിൽ കേരളത്തിലെ കോൺഗ്രസിന്റെ ഭാവി ഇല്ലാതാകുമെന്നും അദ്ദേഹം പറഞ്ഞു. ഡിസിസി പ്രസിഡന്റുമാരെ വെക്കുമ്പോൾ ഒരു മാനദണ്ഡം വേണ്ടേ? ഇത് ഇഷ്ടക്കാരെ ഇഷ്ടം പോലെ വെക്കുന്ന അവസ്ഥയാണെന്നും കെപി അനിൽ കുമാർ പറഞ്ഞു.
Also Read :
അനിൽ കുമാറിന് പുറമെ മുൻ എംഎൽഎ കെ ശിവദാസൻ നായരേയും സസ്പെൻഡ് ചെയ്തിരുന്നു. കെപി അനിൽ കുമാറിനെ പിന്തുണയ്ക്കുന്ന അഭിപ്രായം ആയിരുന്നു കെ ശിവദാസൻ നായരുടേത്. കെപിസിസി പ്രസിഡന്‍റിന്‍റെയും പ്രതിപക്ഷ നേതാവിന്‍റെയും നാല് വർക്കിങ് പ്രസിഡന്‍റുമാരുടേയും ഇഷ്ടക്കാരെ വെച്ചുകൊണ്ട് കേരളത്തിലെ കോൺഗ്രസിനെ പുനരുജ്ജീവിപ്പിക്കാൻ സാധിക്കില്ലെന്നായിരുന്നു ശിവദാസൻ നായർ പറഞ്ഞത്.
