വെള്ളിയാഴ്ചയാണ് തോന്നക്കൽ സ്വദേശി ജയചന്ദ്രനേയും മൂന്നാം ക്ലാസുകാരി മകളേയും മൊബൈൽ ഫോൺ മോഷ്ടിച്ചെന്നാരോപിച്ച് രജിത പരസ്യമായി വിചാരണ ചെയ്തത്. വാഹനത്തിൽ ഉണ്ടായിരുന്ന തന്റെ ഫോൺ ജയചന്ദ്രൻ മോഷ്ടിച്ചെന്നായിരുന്നു ആരോപണം. മോഷ്ടിച്ച ഫോൺ ജയചന്ദ്രൻ മകൾക്ക് കൈമാറിയെന്നും രജിത ആരോപിച്ചു. അര മണിക്കൂറോളമാണ് ഇല്ലാത്ത ഫോൺ മോഷണത്തിന്റെ പേരിൽ ജയചന്ദ്രനേയും മകളേയും രജിത പരസ്യ വിചാരണയ്ക്ക് വിധേയമാക്കിയത്.
ഐഎസ്ആ‍ര്‍ഒയിലേക്ക് കൂറ്റൻ യന്ത്ര സാമഗ്രികൾ കൊണ്ടുപോകുന്നത് കാണാൻ എത്തിയതായിരുന്നു ജയചന്ദ്രനും മകളും. വാഹനം എത്താൻ വൈകിയതോടെ അടുത്തുള്ള കടയിൽ പോയി വെള്ളം കുടിച്ച ശേഷം ഇരുവരും മടങ്ങിയെത്തി. നിർത്തിയിട്ട പിങ്ക് പോലീസ് വാഹനത്തിനു സമീപം നിൽക്കുകയായിരുന്നു ജയചന്ദ്രനും മകളും. ഇതിനിടെ പിങ്ക് പോലീസ് വാഹനത്തിനു സമീപത്തു നിന്ന രജിത ജയചന്ദ്രനോട് ഫോൺ നൽകാൻ ആവശ്യപ്പെട്ടു.
ജയചന്ദ്രൻ സ്വന്തം ഫോൺ നൽകിയപ്പോൾ ഇതല്ല, വാഹനത്തിൽ നിന്നും മോഷ്ടിച്ച ഫോൺ നൽകണമെന്ന് രജിത പറഞ്ഞു. ജയചന്ദ്രൻ ഫോൺ എടുത്തെന്നും മകൾക്ക് ഫോൺ കൈമാറുന്നത് താൻ കണ്ടതാണെന്നും രജിത ആരോപിച്ചു. ചോദ്യം ചെയ്യലിനിടെ കുട്ടി ഉറക്കെ കരഞ്ഞതോടെ നാട്ടുകാ‍ര്‍ ചുറ്റുംകൂടി. ജയചന്ദ്രൻ തന്റെ ഷ‍ര്‍ട്ട് ഉയ‍ര്‍ത്തി കാട്ടി ദേഹപരിശോധനയ്ക്ക് സന്നദ്ധനാകുകയും ചെയ്തു. ഫോൺ മോഷ്ടിച്ചിട്ടില്ലെന്ന് കരഞ്ഞു പറഞ്ഞെങ്കിലും രജിത ചെവിക്കൊണ്ടില്ല. കുട്ടികളെക്കൊണ്ട് മോഷ്ടിക്കാൻ ഇറങ്ങുന്നവർക്ക് ഇതൊക്കെ പതിവാണെന്നായിരുന്നു രജിതയുടെ ആരോപണം.
ഇതിനിടെ ദേശീയ പാതയിൽ ഡ്യൂട്ടിയിൽ ഉണ്ടായിരുന്ന പോലീസ് ഉദ്യോഗസ്ഥ രജിതയുടെ ഫോണിലേക്ക് വിളിച്ചു. സൈലന്റാക്കിയ ഫോൺ വൈബ്രേഷൻ ഓണാക്കിയ നിലയിൽ കാറിനുള്ളിലെ ബാഗിൽ നിന്നും കണ്ടെത്തി. ഫോൺ സ്വന്തം ബാഗിൽ നിന്നു ലഭിച്ചിട്ടും രജിത വിട്ടുകൊടുത്തില്ല. സംഭവത്തിന്റെ ദൃശ്യങ്ങൾ പകർത്തിയ മറ്റൊരാൾ വീഡിയോ സമൂഹമാധ്യമത്തിലൂടെ പുറത്തു വിട്ടപ്പോഴാണ് സംഭവം പുറത്തറിഞ്ഞത്.
സംഭവത്തിൽ ബാലാവകാശ കമ്മീഷന് ജയചന്ദ്രൻ പരാതി നൽകിയിട്ടുണ്ട്. ആറ്റിങ്ങലിലെ വീട്ടിലെത്തിയ ബാലാവകാശ കമ്മീഷൻ ചെയ‍‍ര്‍മാനും ആറ്റിങ്ങൽ പോലീസും കുട്ടിയുടെ മൊഴി രേഖപ്പെടുത്തിയിട്ടുണ്ട്. കുട്ടിക്ക് കൗൺസലിംഗ് നൽകണമെന്നാണ് ബാലാവകാശ കമ്മീഷന്റെ നി‍ര്‍ദ്ദേശം. സംഭവത്തിൽ ഉന്നതാധികാരികൾക്ക് പരാതി നൽകുമെന്നും ജയചന്ദ്രൻ വ്യക്തമാക്കിയിട്ടുണ്ട്.
മുമ്പ് വഴിയിൽ കിടന്നു കിട്ടിയ ഫോൺ തിരികെ കൊടുത്ത മാതൃകയായ വ്യക്തിയാണ് ജയചന്ദ്രൻ. രണ്ട് വർഷം മുമ്പ് വേങ്ങോട് ജംഗ്ഷന് സമീപത്തു നിന്നാണ് വിലയേറിയ ഫോൺ ജയചന്ദ്രന് വഴിയിൽ കിടന്നുകിട്ടിയത്. വേങ്ങോട് വിവാഹത്തിനെത്തിയ യുവാവിന്റേതായിരുന്നു ഫോൺ. തനിക്ക് ലഭിച്ച ഫോണിലേക്ക് തുടരെ തുടരെ കോളുകൾ വന്നെങ്കിലും കോൾ എടുത്ത് സംസാരിക്കാൻ ജയചന്ദ്രന് അറിയില്ലായിരുന്നു. ഫോണിൽ കണ്ട നമ്പർ തന്റെ ഫോണിൽ ഡയൽ ചെയ്ത് തിരികെ വിളിച്ചാണ് ഫോൺ ലഭിച്ച കാര്യം യുവാവിനെ അറിയിച്ചത്. ഫോൺ തിരികെ കിട്ടിയ സന്തോഷത്തിൽ ജയചന്ദ്രന് സമ്മാനങ്ങൾ നൽകിയ ശേഷമാണ് യുവാക്കൾ മടങ്ങിയത്.
