വിവിധ വിദേശ രാജ്യങ്ങളിലേക്ക് മടങ്ങാൻ അവസരം ലഭിച്ചിരിക്കുന്ന പ്രവാസികൾക്ക് അമിത യാത്രാച്ചിലവ് ഉണ്ടാക്കുന്നതാണ് വിമാനത്താവളങ്ങളിൽനിശ്ചയിച്ചിരിക്കുന്ന കോവിഡ് പരിശോധന നിരക്കെന്ന് ലോക കേരളസഭാംഗം എൻ കെ കുഞ്ഞുമുഹമ്മദ്. ദീർഘ കാലത്തെ കാത്തിരിപ്പിനൊടുവിലാണ് വിവിധ വിദേശ രാജ്യങ്ങളിലേക്ക് മടങ്ങാൻ പ്രവാസികൾക്ക് പരിമിതമായ അവസരം ലഭിച്ചിരിക്കുന്നത്.
കേരളത്തിൽ നിന്ന് മടങ്ങുന്ന പ്രവാസികൾക്ക് 48 മണിക്കൂറിനുള്ളിൽ എടുക്കേണ്ട കോവിഡ് പരിശോധന നിരക്ക് 500 രൂപ മാത്രമാണ് എന്നിരിക്കെയാണ്, വിമാനത്താവളങ്ങളിൽ എത്തി യാത്രയുടെ 4 മണിക്കൂറിനുള്ളിൽ നടത്തേണ്ട പരിശോധനയ്ക്ക് അഞ്ചിരട്ടി തുകയായ 2500 രൂപയോളം നൽകേണ്ടി വരുന്നത്. മാസങ്ങളായി തൊഴിലില്ലാതെ കഷ്ടപ്പെട്ട് ഇന്ത്യയിൽ കുടുങ്ങിപ്പോയ പ്രവാസികളാണ് ഇപ്പോൾ അവസരം പ്രയോജനപ്പെടുത്തി മടങ്ങാൻ ശ്രമിക്കുന്നത്. അതുകൊണ്ടുതന്നെ പ്രവാസികളെ സംബന്ധിച്ച് ഇതൊരു ഇരുട്ടടിയാവുകണെന്ന് എൻ കെ കുഞ്ഞുമുഹമ്മദ് ചൂണ്ടിക്കാട്ടി.
രാജ്യത്തിന്റെ സമ്പദ് വ്യവസ്ഥയ്ക്ക് കരുത്താകുന്ന പ്രവാസികളെ അവരുടെ ദുരിതകാലത്ത് സഹായിക്കുന്നില്ല എന്നുമാത്രമല്ല ശിക്ഷിക്കാൻ കൂടിയാണ് ഈ നടപടിയിലൂടെ കേന്ദ്രം ശ്രമിക്കുന്നത്. വിമാനത്താവളങ്ങളിലെ പരിശോധന നിരക്ക് മാതൃകാപരമായി പുതുക്കി നിശ്ചയിച്ച് പ്രവാസികൾക്ക് കൈത്താങ്ങാകാനുള്ള നടപടിയിലേക്ക് കേന്ദ്രം കടക്കണമെന്നും എൻ കെ കുഞ്ഞു മുഹമ്മദ് പ്രസ്താവനയിൽ ആവശ്യപ്പെട്ടു.
