മാഡ്രിഡ്
പിഎസ്ജി മുന്നേറ്റക്കാരൻ കിലിയൻ എംബാപ്പെയെ സ്വന്തമാക്കാൻ റയൽ മാഡ്രിഡ്. 1400 കോടി രൂപയാണ് ഇരുപത്തിരണ്ടുകാരന് റയലിന്റെ വാഗ്ദാനം. പിഎസ്ജി വിടാനുള്ള മോഹം ഫ്രഞ്ചുകാരൻ വ്യക്തമാക്കി. അടുത്തവർഷം ജൂൺ വരെ കരാറുണ്ടെങ്കിലും തുടരാനില്ലെന്ന് എംബാപ്പെ ക്ലബ്ബിനെ അറിയിച്ചു. ലയണൽ മെസിയുടെ വരവോട് കൂടിയാണ് എംബാപ്പെ തീരുമാനമെടുത്തത്. മുന്നേറ്റത്തിൽ മെസിയും നെയ്മറും ഒത്തുചേർന്നാൽ അവസരം കുറയുമെന്നാണ് താരത്തിന്റെ കണക്കുക്കൂട്ടൽ. 2017 മുതൽ പിഎസ്ജിയിലുണ്ട് എംബാപ്പെ. 174 കളിയിൽ 133 ഗോളടിച്ചു.
ക്രിസ്റ്റ്യാനോ റൊണാൾഡോ ടീം വിട്ടതുമുതൽ മുന്നേറ്റത്തിൽ മികച്ച കളിക്കാരനെ തേടുകയാണ് റയൽ. കരീം ബെൻസെമയെമാത്രം ആശ്രയിച്ചാണ് നിലവിൽ കളിക്കുന്നത്. ഈ സീസണിൽ പ്രധാന താരങ്ങളായ സെർജിയോ റാമോസും റാഫേൽ വരാനെയും ടീം വിട്ടതും ക്ഷീണമായി. പ്രതിരോധക്കാരൻ ഡേവിഡ് അലാബയെമാത്രമാണ് ഇത്തവണ ടീമിൽ എത്തിച്ചത്. കോവിഡിനെ തുടർന്നുള്ള സാമ്പത്തികപ്രതിസന്ധിയും ടീമിനെ ഞെരുക്കി.
