പൊന്നാനി > മലപ്പുറം, പാലക്കാട്, തൃശൂർ, ആലപ്പുഴ ജില്ലകളിലായി നാൽപതോളം സ്ത്രീകളുടെ മാല പൊട്ടിച്ച് രക്ഷപ്പെട്ട പിടികിട്ടാപ്പുള്ളികൾ അറസ്റ്റിൽ. ഹരിപ്പാട് മണ്ണാറശാലയിലെ തറയിൽ ഉണ്ണി (31), കൊല്ലം അഞ്ചാലുംമൂട് പെരുനാട് സ്വദേശി കൊച്ചുഴിയത്ത് പാണയിൽ വീട്ടിൽ ശശി (43–-കാവനാട് ശശി) എന്നിവരെയാണ് പെരുമ്പടപ്പ് സിഐ വി എം കേഴ്സണിന്റെ നേതൃത്വത്തിൽ പിടികൂടിയത്.
പ്രതികൾ മലപ്പുറം ജില്ലയിലേക്ക് കടന്നതായി വിവരം കിട്ടിയതിനെ തുടർന്ന് ദേശീയ പാതയിലെ പാലപ്പെട്ടി കാപ്പിരിക്കാട് നടത്തിയ വാഹന പരിശോധനയിലാണ് വലയിലായത്. ഇവർ നിരവധി മോഷണക്കേസുകളിൽ ഒരുമിച്ച് ജയിലിൽ കഴിഞ്ഞശേഷം കഴിഞ്ഞവർഷമാണ് ജാമ്യത്തിൽ ഇറങ്ങിയത്. തുടർന്ന് കഴിഞ്ഞ എട്ടിന് ആലപ്പുഴ ജില്ലയിൽ രണ്ട് മണിക്കൂറിനുള്ളിൽ വനിതാ പൊലീസുകാരിയുടെയടക്കം അഞ്ച് സ്ത്രീകളുടെ മാല പൊട്ടിച്ച് രക്ഷപ്പെട്ടു. ഇവരെ പിടികൂടാൻ മലപ്പുറം ജില്ലാ പൊലീസ് മേധാവിയുടെ നേതൃത്വത്തിൽ ‘സ്നാച്ചിങ് കോമെറ്റ്’ സംഘത്തിന് രൂപംനൽകിയിരുന്നു.
ഇവർ നടത്തിയ അന്വേഷണത്തിൽ മാല പൊട്ടിക്കാൻ ഉപയോഗിച്ച ബൈക്ക് മോഷ്ടിച്ചതാണെന്ന് വ്യക്തമായി. വിവിധ ജില്ലകളിൽ സമാന കേസിലെ പ്രതികളാണെന്നും ബൈക്ക് റൈഡിങ്ങിൽ വിദഗ്ധരാണെന്നും മനസ്സിലാക്കി. ഇതോടെ പ്രതികളെ പിടിക്കാനായി പൊലീസ് ബൈക്ക് റൈഡിങ് വിദഗ്ധരായ യുവാക്കളെ ഉപയോഗിച്ച് നിരീക്ഷണം നടത്തിയിരുന്നു.
ഇവർ വിവിധ സ്ഥലങ്ങളിൽ വ്യാജ ആധാർ കാർഡുകളുണ്ടാക്കി ഈ പേരുകളിലാണ് താമസിച്ചിരുന്നത്. ഇത്തരം നിരവധി വ്യാജ തിരിച്ചറിയൽ രേഖകൾ പൊലീസ് കണ്ടെത്തി. ഒരുവർഷത്തിനിടെ നൂറോളം സിംകാർഡുകളും ഉപയോഗിച്ചു. കിട്ടുന്ന പണം ഉപയോഗിച്ച് ആഡംബര ജീവിതമാണ് പ്രതികൾ നയിച്ചിരുന്നത്. ഉണ്ണി ആലപ്പുഴ വീയപുരം സ്റ്റേഷനിലെ കൊലപാതക കേസിലെ പ്രതികൂടിയാണ്.
