മാഡ്രിഡ്
സ്പാനിഷ് ഫുട്ബോൾ ലീഗിൽ റയൽ മാഡ്രിഡിന് സമനില. ലെവന്റെയാണ് റയലിനെ കുരുക്കിയത് (3–3). 1–2ന് പിന്നിൽനിന്ന റയലിനെ ഇരട്ടഗോളടിച്ച് വിനീഷ്യസ് ജൂനിയറാണ് ഉയർത്തിയത്. ഗാരെത് ബെയ്–ലിലൂടെ റയലാണ് മത്സരത്തിൽ മുന്നിലെത്തിയത്. എന്നാൽ രണ്ടാംപകുതിയുടെ തുടക്കം റോജർ മാർടിയും ഹൊസെ കംപാനയും ലെവന്റെയ്ക്കായി ലക്ഷ്യം കണ്ടു. വിനീഷ്യസ് റയലിനെ ഒപ്പമെത്തിച്ചെങ്കിലും റോബെർ പിയെർ വീണ്ടും ലെവന്റെയ്ക്ക് ലീഡ് സമ്മാനിച്ചു. 85–ാംമിനിറ്റിൽ ഉഗ്രൻ ഗോളിലൂടെ വിനീഷ്യസ് റയലിന് ആശ്വാസംനൽകി.
ഗോൾകീപ്പർ ഐറ്റർ ഫെർണാണ്ടസ് ചുവപ്പ് കാർഡ് കിട്ടി പുറത്തായതോടെ പത്തുപേരുമായാണ് ലെവന്റെ കളി പൂർത്തിയാക്കിയത്. പ്രതിരോധക്കാരൻ റൂബെൻ വെസോയാണ് പകരംഗോളിയായത്. ചാമ്പ്യൻമാരായ അത്–ലറ്റികോ മാഡ്രിഡ് ഒറ്റഗോളിന് എൽച്ചെയെ മറികടന്നു. എയ്ഞ്ചൽ കൊറിയയാണ് ലക്ഷ്യം കണ്ടത്.
