റോം
‘വാറിൽ’ തോറ്റ് ക്രിസ്റ്റ്യാനോ റൊണാൾഡോ. പരിക്കുസമയം യുവന്റസിന്റെ വിജയഗോൾ കുറിച്ച് കുപ്പായമൂരി ആഘോഷിച്ച റൊണാൾഡോയെ നിമിഷനേരംകൊണ്ട് ‘വാർ’തിരുത്തി. ഓഫ്സെെഡ് കെണിയിൽപ്പെട്ട് ഗോളനുവദിച്ചില്ല. ഇറ്റാലിയൻ ഫുട്ബോൾ ലീഗിൽ ഉഡിനിസിനോട് യുവന്റസ് 2–2ന് സമനിലയുമായി മടങ്ങി.
മത്സരത്തിൽ പകരക്കാരനായെത്തിയായിരുന്നു റൊണാൾഡോയുടെ പ്രകടനം. പരിക്കുസമയം ഹെഡ്ഡറിലൂടെ എതിർവല കുലുക്കി. പിന്നാലെ കുപ്പായമൂരി ആഘോഷിച്ചു. പക്ഷേ, ഗോൾ വീഡിയോ പരിശോധനയിൽ ഓഫ്സെെഡാണെന്ന് തെളിഞ്ഞു. ചിരിയോടെയായിരുന്നു വിധിയെ റൊണാൾഡോ നേരിട്ടത്.
പൗലോ ഡിബാലെയിലൂടെയും യുവാൻ കൊദ്രാദോയിലൂടെയും മുന്നിലെത്തിയ യുവന്റസിനെ ഉഡിനിസ് തളയ്ക്കുകയായിരുന്നു. റോബർട്ടോ പെരേരിയയും ജെറാർഡ് ദെയുലോഫെയും ഗോൾ മടക്കി. മുന്നിലെത്താനുള്ള യുവന്റസിന്റെ ശ്രമങ്ങളെല്ലാം പിഴച്ചു. മറ്റ് മത്സരങ്ങളിൽ കരുത്തരായ റോമയും നാപ്പോളിയും ജയിച്ചു.
