കോഴിക്കോട്: പ്രശസ്ത കായിക പരിശീലകൻ ഒ.എം.നമ്പ്യാരുടെ നിര്യാണത്തിൽ അനുശോചിച്ച് അദ്ദേഹത്തിന്റെ പ്രധാന ശിഷ്യയായിരുന്ന പി.ടി.ഉഷ. തന്റെ ജീവിതത്തിലെ ഒ.എം.നമ്പ്യാരുടെ സംഭാവനകൾ വാക്കുകളിൽ പ്രകടിപ്പിക്കാനാകില്ലെന്ന് അവർ വ്യക്തമാക്കി. ഫെയ്സ്ബുക്കിലൂടെയാണ് പി.ടി.ഉഷയുടെ പ്രതികരണം.
എന്റെ ഗുരുവും പരിശീലകനും വഴിവെളിച്ചവുമായ ഒ.എം.നമ്പ്യാരുടെ മരണം ഒരിക്കലും നികത്താനാകാത്ത ഒരു ശൂന്യത സൃഷ്ടിച്ചു. എന്റെ ജീവിതത്തിൽ അദ്ദേഹത്തിന്റെ സംഭാവനകൾ വാക്കുകൾകൊണ്ട് പറഞ്ഞറിയിക്കാനാകില്ല ഉഷ വ്യക്തമാക്കി.
ഇന്ത്യയിലെ ആദ്യ ദ്രോണാചാര്യ അവാർഡ് ജേതാവാണ് ഒ.എം.നമ്പ്യാർ. പി.ടി.ഉഷയുടെ കോച്ചെന്ന നിലയിലാണ് നമ്പ്യാർ കൂടുതൽ പ്രശസ്തിയും അംഗീകാരവും നേടിയത്. 1984 ലോസ്ഏഞ്ചൽസ് ഒളിമ്പിക്സിൽ പി.ടി.ഉഷയുടെ കോച്ചായിരുന്നു.
