പണത്തിന്റെ ഉറവിടത്തിൽ സംശയം തോന്നിയ 18 കൗൺസിലർമാർ തുക തിരിച്ച് നൽകി. ചെയർപേഴ്സണിൻ്റെ നടപടിയിൽ അന്വേഷണം ആവശ്യപ്പെട്ട് കൗൺസിലർമാർ വിജിലൻസ് ഡയറക്ടർക്ക് പരാതി നൽകി. ഓരോ അംഗങ്ങളെയും തനിച്ച് ക്യാബിനിലേക്ക് വിളിച്ചുവരുത്തിയാണ് ഓണക്കോടിക്കൊപ്പം പണം നൽകിയത്. കവറിലാണ് പണം നൽകിയത്. പണം കൈപ്പറ്റുന്നതിലെ പ്രശ്നങ്ങൾ തിരിച്ചറിഞ്ഞ പ്രതിപക്ഷത്തുള്ള കൗൺസിലർമാർ അടക്കമുള്ള 18 പേരാണ് തുക തിരികെ നൽകിയത്.
43 പേർക്ക് പതിനായിരം രൂപ വീത നൽകാൻ കുറഞ്ഞത് 4,30, 000 രൂപയെങ്കിലും വേണ്ടിവരും. ഈ പണം എവിടെ നിന്നാണ് വകമാറ്റിയതെന്ന ചോദ്യമാണ് ഉയരുന്നത്. നഗരസഭയ്ക്ക് പ്രത്യേക ഫണ്ടില്ലെന്നിരിക്കെ ഈ പണം എവിടെ നിന്നാണെന്നാണ് അംഗങ്ങളുടെ സംശയം. നഗരസഭയിലെ അഴിമതി പണമാണെന്ന ആരോപണം ശക്തമാണ്. ഇതിനിടെ നഗരസഭയിൽ നിന്ന് ലഭിച്ച ഓണക്കോടി 10 ആശാവർക്കമാർ തിരികെ നൽകി.
പണം നൽകിയ നടപടി വിവാദമായതോടെ ആരോപണങ്ങൾ തള്ളി അജിത തങ്കപ്പൻ രംഗത്തുവന്നു. “താൻ പതിനായിരം രൂപ നൽകിയിട്ടില്ല. പണം തിരികെ നൽകിയെന്ന കൗൺസിലർമാരുടെ വാദം കളവാണ്”- എന്നും അവർ പറഞ്ഞു. 43 അംഗ കൗൺസിലിൽ നാല് സ്വതന്ത്രരുടെ പിന്തുണയോടെയാണ് യുഡിഎഫ് ചെയർപേഴ്സൺ ആയ അജിത തങ്കപ്പൻ ഭരണം നടത്തുന്നത്. കൊവിഡ്-19 ഭീഷണിയിൽ നഗരസഭകൾ കടുത്ത പ്രതിസന്ധി തുടരുന്നതിനിടെയാണ് തൃക്കാക്കര നഗരസഭാധ്യക്ഷ കൗൺസിലർമാർക്ക് പണം വിതരണം ചെയ്തത്.
