ടൂറിൻ
യുവന്റസ് വിടുകയാണെന്ന വാർത്തകളോട് രൂക്ഷമായി പ്രതികരിച്ച് ക്രിസ്റ്റ്യാനോ റൊണാൾഡോ. താനെന്ന കളിക്കാരനെയും മനുഷ്യനെയും അപമാനിക്കുന്ന രീതിയിലാണ് മാധ്യമങ്ങൾ അഭ്യൂഹങ്ങൾ ഉയർത്തുന്നതെന്ന് റൊണാൾഡോ പറഞ്ഞു. ഇൻസ്റ്റഗ്രാമിലായിരുന്നു റൊണാൾഡോയുടെ കുറിപ്പ്. അതേസമയം, യുവന്റസിൽ എത്രകാലം തുടരുമെന്ന കാര്യത്തിൽ മുപ്പത്താറുകാരൻ വ്യക്തത വരുത്തിയില്ല.
പിഎസ്ജി, റയൽ മാഡ്രിഡ്, മാഞ്ചസ്റ്റർ സിറ്റി ക്ലബ്ബുകൾ റൊണാൾഡോയെ സ്വന്തമാക്കാൻ ശ്രമിക്കുന്നുവെന്നായിരുന്നു വാർത്തകൾ. എല്ലാം അസംബന്ധങ്ങളാണെന്ന് പോർച്ചുഗൽ താരം പ്രതികരിച്ചു.റൊണാൾഡോയെ കൊണ്ടുവരാൻ ശ്രമിക്കില്ലെന്ന് റയൽ പരിശീലകൻ കാർലോ ആൻസെലോട്ടി വ്യക്തമാക്കിയിരുന്നു.
‘റയലുമായുള്ള എന്റെ ബന്ധം വ്യക്തമാണ്. ചരിത്രത്തിലത് രേഖപ്പെടുത്തിയിരിക്കുന്നു. വാക്കുകളാലും കണക്കുകളാലും കിരീടങ്ങളാലും. റയൽ ഇപ്പോഴും എന്നെ സ്നേഹിക്കുന്നു. അവരുടെ ഹൃദയത്തിൽ ഞാനുണ്ട്’– റൊണാൾഡോ പറഞ്ഞു.യുവന്റസിൽ കരാർ അവസാനിക്കാൻ 10 മാസംകൂടിയുണ്ട്.
