‘ഇഎംഎസ് അല്ല, പാർട്ടിയിലെ പെണ്ണുങ്ങൾ തന്റെ ചൊൽപ്പടിക്ക് നിൽക്കണമെന്ന ഇഎംഎസിന്റെ ആൺ അഹന്തക്കെതിരെ പൊരുതിയ കെആർ ഗൗരി ആണെന്റെ ഹീറോ.’ എന്നാണ് ഫാത്തിമ തഹ്ലിയ ഫേസ്ബുക്കിൽ കുറിച്ചത്.
എംഎസ്എഫ് സംസ്ഥാന നേതൃത്വത്തിനെതിരെ പരാതി ഉന്നയിച്ചതിന്റെ പേരിൽ വിദ്യാ‍ര്‍ത്ഥിനി വിഭാഗമായ ഹരിതയുടെ പ്രവ‍ര്‍ത്തനം മുസ്ലിം ലീഗ് മരവിപ്പിച്ചിരുന്നു. ഹരിതയുടേത് അച്ചടക്ക ലംഘനമാണെന്നാണ് മുസ്ലിം ലീഗ് നേതൃത്വം പറയുന്നത്. ഇതിനു പിന്നാലെയാണ് ലീഗ് നേതൃത്വത്തിനെതിരെ പരോക്ഷ വിമർശനവുമായി ഫാത്തിമ രംഗത്തെത്തിയിരിക്കുന്നത്. ലൈംഗികാധിക്ഷേപം നടത്തിയ എംഎസ്എഫ് നേതാക്കൾക്കെതിരെ വനിതാ കമ്മീഷന് പരാതി നൽകിയതാണ് മരവിപ്പിക്കലിലേക്ക് നയിച്ചത്.
അതേസമയം, ലൈംഗികാധിക്ഷേപം നടത്തിയെന്ന ഹരിത നേതാക്കളുടെ പരാതിയിൽ എംഎസ്എഫ് സംസ്ഥാന നേതൃത്വത്തിനെതിരെ കേസെടുത്തു. സംസ്ഥാന പ്രസിഡന്റ് പികെ നവാസ്, മലപ്പുറം ജീല്ലാ സെക്രട്ടറി അബ്ദുൽ വഹാബ് എന്നിവ‍ര്‍ക്കെതിരെയാണ് കേസെടുത്തത്. ലൈംഗിക ചുവയോടെ സംസാരിച്ചതിന് 354(A) വകുപ്പ് പ്രകാരമാണ് കോഴിക്കോട് വെള്ളയിൽ പോലീസ് കേസെടുത്തത്.
ആരോപണ വിധേയരായ പികെ നവാസ്, കബീ‍‍ര്‍ മുതുപറമ്പ്, വിഎ നവാസ് എന്നിവരോട് വിശദീകരണം ചോദിക്കുമെന്ന് ലീഗ് നേതൃത്വം വ്യക്തമാക്കിയിട്ടുണ്ട്. ലീഗ് സംസ്ഥാന സെക്രട്ടറി പിഎംഎ സലാം പുറത്തിറക്കിയ വാ‍‍ര്‍ത്താ കുറിപ്പിലാണ് ഇക്കാര്യം വ്യക്തമാക്കിയിരിക്കുന്നത്.
