ലണ്ടൻ
ഇംഗ്ലീഷ് പ്രീമിയർ ലീഗ് ഫുട്ബോളിൽ കരുത്തരായ മാഞ്ചസ്റ്റർ യുണെെറ്റഡ്, ലിവർപൂൾ, ചെൽസി എന്നിവർ ഇന്നിറങ്ങും. യുണെെറ്റഡിന് ലീഡ്സ് യുണെെറ്റഡാണ് എതിരാളി. ഈ സീസണിൽ യുണെെറ്റഡ് ടീമിലെത്തിച്ച ജയ്ഡെൻ സാഞ്ചോ ഇന്ന് ബെഞ്ചിലിരിക്കും. രണ്ടാംസ്ഥാനത്താണ് ഒലേ ഗുണ്ണാർ സോൾചെയറിന്റെ യുണെെറ്റഡ് കഴിഞ്ഞ സീസൺ അവസാനിപ്പിച്ചത്. മാഴ്സെലോ ബിയേൽസയുടെ ലീഡ്സ് ഒമ്പതാമതും. ലിവർപൂളിന് സ്ഥാനക്കയറ്റം കിട്ടിയെത്തിയ നോർവിച്ച് സിറ്റിയുമായാണ് മത്സരം. ചെൽസി ക്രിസ്റ്റൽ പാലസുമായി ഏറ്റുമുട്ടും. ഫ്രഞ്ച് മുൻ മധ്യനിരക്കാരൻ പാട്രിക് വിയേറയാണ് പാലസിന്റെ പരിശീലകൻ. പ്രീമിയർ ലീഗിൽ നാൽപ്പത്തഞ്ചുകാരന്റെ പരിശീലകനായുള്ള അരങ്ങേറ്റമാകും ചെൽസിക്കെതിരായ മത്സരം.
ലെസ്റ്റർ സിറ്റി–വൂൾവറാംപ്ടൺ വാണ്ടറേഴ്സ് പോരാണ് മറ്റൊരു ശ്രദ്ധേയ മത്സരം. ഏഴ് കളികളാണ് ഇന്ന്. എവർട്ടൺ, ആസ്റ്റൺ വില്ല ടീമുകളും രംഗത്തുണ്ട്.
