കൊച്ചി: അഭിനയ ജീവിതത്തിന്റെ അഞ്ച് പതിറ്റാണ്ട് പൂർത്തിയാക്കിയ മലയാളത്തിന്റെ മഹാനടൻ മമ്മൂട്ടിയെ വീട്ടിലെത്തി ആദരിച്ച് ബിജെപി. മമ്മൂട്ടിയുടെ കൊച്ചിയിലെ വീട്ടിലെത്തിയ കെ സുരേന്ദ്രൻ അദ്ദേഹത്തെ പൊന്നാട അണിയിച്ചു. എറണാകുളം ജില്ലാ നേതാക്കൾക്കൊപ്പമാണ് കെ സുരേന്ദ്രൻ മമ്മൂട്ടിയുടെ വീട്ടിലെത്തിയത്.
അഭിനയജീവിതത്തിൽ അൻപതുവർഷം പൂർത്തിയാക്കുന്ന മലയാളത്തിന്റെ മഹാനടൻ മമ്മൂട്ടിയെ വീട്ടിൽ ചെന്ന് ആദരിച്ചതായി കെ സുരേന്ദ്രൻ ഫേസ്ബുക്ക് പോസ്റ്റിൽ പറഞ്ഞു. ചിത്രങ്ങളും പങ്കുവെച്ചിട്ടുണ്ട്. ബിജെപി സംഘം ഒരു മണിക്കൂറോളം മമ്മൂട്ടിയുടെ വീട്ടിൽ ചെലവഴിച്ചു.
കൊവിഡ് കാലത്ത് പണം ചെലവാക്കിയുള്ള ആഘോഷം തന്റെ പേരിൽ സംഘടിപ്പിക്കരുതെന്ന് ആവശ്യപ്പെട്ടിരുന്നു. മമ്മൂട്ടിയുടെ സിനിമാ ജീവിതം ആഘോഷമാക്കാൻ സംസ്ഥാന സർക്കാർ പദ്ധതിയിടുന്നതിനിടെയാണ് അദ്ദേഹം തന്റെ നിലപാട് അറിയിച്ചത്. ഓഗസ്റ്റ് ആറിനാണ് മമ്മൂട്ടിയുടെ സിനിമാ പ്രവേശനത്തിന്റെ അമ്പത് വർഷം പൂർത്തിയായത്.
