മുരിങ്ങൂർ പീഡനക്കേസിൽ പ്രതിയുടെ അറസ്റ്റ് അനിവാര്യമാണെന്നും കസ്റ്റഡിയിൽ ചോദ്യം ചെയ്യേണ്ടതുണ്ടെന്നുമുള്ള പ്രോസിക്യൂഷന്‍റെ വാദം കണക്കിലെടുത്താണ് പ്രതിയുടെ മുൻകൂർ ജാമ്യ ഹർജി കോടതി തള്ളിയതെന്ന് ന്യൂസ്18 മലയാാളം റിപ്പോർട്ട് ചെയ്തു. ജസ്റ്റിസ് വി ഷർസിയാണ് ജാമ്യാപേക്ഷ നിരസിച്ചത്. കേസില്‍ പൊലീസിന്‍റെ ഭാഗം കേട്ട ശേഷം അത് അംഗീകരിച്ചുകൊണ്ടാണ് നടപടി.
കേസ് അന്വേഷണം പ്രാഥമിക ഘട്ടത്തിലാണെന്നും മൊബൈൽ ഫോൺ കണ്ടെടുക്കേണ്ടതുണ്ടെന്നും ലൈംഗിക പരിശോധന നടത്തേണ്ടതുണ്ടെന്നും സാക്ഷികളുടെ ചോദ്യം ചെയ്യൽ പൂർത്തിയായിട്ടില്ലെന്നും പ്രോസിക്യൂഷൻ കോടതിയെ അറിയിച്ചു. പരാതി കൊടുക്കാൻ വൈകിയെന്ന പ്രതിയുടെ വാദം കോടതി തള്ളുകയും ചെയ്തു.
2016ലാണ് കേസിനാസ്പദമായ സംഭവം. ഒളിംപ്യന്‍ മയൂഖ ജോണിയുടെ സുഹൃത്ത് ബലാത്സംഗത്തിനിരയായെന്നാണ് ആരോപണം. കേസ് അട്ടിമറിക്കാന്‍ ശ്രമം നടന്നെന്നാരോപിച്ച് മയൂഖ ജോണി രംഗത്തെത്തിയതോടെയാണ് പരാതി ശ്രദ്ധ നേടുന്നത്.
അതേസമയം നാലര വര്‍ഷം മുമ്പു നടന്ന സംഭവത്തില്‍ ശാസ്ത്രീയ തെളിവില്ലെന്ന് പോലീസ് നേരത്തെ അറിയിച്ചിരുന്നു. നാലര വര്‍ഷം മുമ്പു നടന്ന കേസായതിനാൽ സാഹചര്യതെളിവുകളുടെ അടിസ്ഥാനത്തിലാണ് കേസ് മുന്നോട്ട് പോകുന്നത്.
