മലപ്പുറം: മുസ്ലിം ലീഗിൽ പി.കെ. കുഞ്ഞാലിക്കുട്ടിക്ക് എതിരേ എതിർ ശബ്ദങ്ങൾ ഉയരുന്നുവെന്ന റിപ്പോർട്ടുകൾക്കിടയിൽ ഇനി അടുത്ത ഉത്തരവാദിത്വത്തിലേക്ക് എന്ന് സൂചിപ്പിക്കുന്ന ഫെയ്സ്ബുക്ക് പോസ്റ്റുമായി കെ.ടി. ജലീൽ. ” സുപ്രഭാതം. സമൃദ്ധം സുന്ദരം. ഇനി അടുത്ത ഉത്തരവാദിത്വത്തിലേക്ക്” – എന്നാണ് അദ്ദേഹം ഫെയ്സ്ബുക്കിൽ കുറിച്ചത്. ജമന്തി പൂക്കൾക്ക് നടുവിൽ നിൽക്കുന്ന ചിത്രം പങ്കുവെച്ചുകൊണ്ടായിരുന്നു കെ.ടി. ജലീലിന്റെ പോസ്റ്റ്.
നേരത്ത, കുഞ്ഞാലിക്കുട്ടിയുടെ ആധിപത്യം ലീഗിൽ അവസാനിക്കുകയാണെന്ന് കെ.ടി ജലീൽ എം.എൽ.എ പറഞ്ഞിരുന്നു. കുഞ്ഞാലിക്കുട്ടി വായ തുറക്കാത്ത ലീഗിന്റെ ചരിത്രത്തിലെ ആദ്യ വാർത്താ സമ്മേളനമാണ് കോഴിക്കോട് നടന്നതെന്നും അദ്ദേഹം പറഞ്ഞു. ലീഗ് നേതൃയോഗത്തിനുശേഷം മുസ്ലിം ലീഗ് നേതാക്കൾ നടത്തിയ വാർത്താ സമ്മേളനത്തിന് തൊട്ടുപിന്നാലെയാണ് കുഞ്ഞാലിക്കുട്ടിക്കെതിരെ വിമർശവുമായി ജലീൽ രംഗത്തെത്തിയത്.
ലീഗിൽ ശുദ്ധികലശം നടത്തേണ്ടി വരും. എന്താണോ കേരളത്തിലെ ജനാധിപത്യ സമൂഹം ആഗ്രഹിച്ചത്, അതാണ് ഇപ്പോൾ നടന്നത്. മാഫിയ രാഷ്ട്രീയത്തിന് എതിരായിട്ടുള്ള ശക്തമായ ഒരു താക്കീത് തന്നെയാണ് ഇന്നത്തെ ലീഗ് നേതൃ യോഗത്തിൽ ഉണ്ടായിട്ടുള്ളത്. കുഞ്ഞാലിക്കുട്ടി യുഗം ലീഗിൽ അവസാനിക്കുകയാണെന്നും കെ.ടി ജലീൽ പറഞ്ഞിരുന്നു.
Content Highlights: K T Jaleel Facebook post
