കൊച്ചി > കുഴൽപ്പണ ഇടപാടിൽ സംസ്ഥാന പ്രസിഡന്റ് കെ സുരേന്ദ്രനെ വിമർശിച്ച യുവമോർച്ച സംസ്ഥാന കൗൺസിൽ അംഗം ആർ അരവിന്ദനെയും ആറ് മണ്ഡലം നേതാക്കളെയും ബിജെപിയിൽനിന്ന് പുറത്താക്കി. എറണാകുളം ജില്ലാ മുൻ വൈസ്പ്രസിഡന്റ് എം എൻ ഗംഗാധരനും കോതമംഗലം മണ്ഡലം മുൻ പ്രസിഡന്റ് പി കെ ബാബുവും അടക്കമുള്ളവരെയാണ് പുറത്താക്കിയത്. എന്നാൽ പൊട്ടിത്തെറി ഒഴിവാക്കാൻ, ജില്ലാ പ്രസിഡന്റ് എസ് ജയകൃഷ്ണനെതിരെ രഹസ്യയോഗം ചേർന്ന 10 മണ്ഡലം പ്രസിഡന്റുമാർക്കെതിരായ നടപടി മാറ്റിവച്ചു.
കെ സുരേന്ദ്രൻ ചാക്കുമായി പോകുന്ന ചിത്രമടങ്ങിയ എഫ്ബി പോസ്റ്റ്, ‘‘ഞങ്ങൾ ഡിജിറ്റലായി ഫണ്ട് കൈമാറുന്നവരാണേ’’ എന്ന അടിക്കുറിപ്പോടെ പങ്കുവച്ചതാണ് അരവിന്ദനെ പുറത്താക്കാൻ കാരണമായി സുരേന്ദ്രൻ ജില്ലാ കമ്മിറ്റിക്ക് അയച്ച സർക്കുലറിൽ പറയുന്നത്.
തെരഞ്ഞെടുപ്പ് ഫണ്ട് സുതാര്യമായി കൈമാറണമായിരുന്നു എന്ന് തെരഞ്ഞെടുപ്പ് അവലോകനങ്ങളിൽ അരവിന്ദൻ അഭിപ്രായപ്പെട്ടിരുന്നു.
ഗംഗാധരനും ബാബുവും കോതമംഗലം മണ്ഡലത്തിലെ വോട്ടുകച്ചവടത്തിൽ പ്രതിഷേധിച്ച് വികസന സമിതി എന്നപേരിൽ സംഘടന രൂപീകരിച്ചിരുന്നു. ഇതിനിടെ വാരപ്പെട്ടി പഞ്ചായത്ത് കോഴിപ്പിള്ളി സൗത്ത് വാർഡ് ഉപതെരഞ്ഞെടുപ്പിലും ബിജെപി പേയ്മെന്റ് സീറ്റ് നടപ്പാക്കി എന്നാരോപിച്ച് പോസ്റ്ററുകൾ വന്നു. ഇതുന്നയിച്ചാണ് ഇവരെ പുറത്താക്കിയത്. മുൻ നിയോജകമണ്ഡലം കൺവീനർ സന്തോഷ് പദ്മനാഭൻ, മണ്ഡലം ഭാരവാഹികളായ മനോജ് കാനാട്ട്, ജയശങ്കർ, അനിൽ മഞ്ചപ്പിള്ളി എന്നിവരെയും പുറത്താക്കി.
എന്നാൽ പുതിയ സംസ്ഥാന കൗൺസിൽ പ്രഖ്യാപിക്കാത്തിടത്തോളം താൻ ഇപ്പോഴും അംഗമാണെന്ന് അരവിന്ദൻ പറഞ്ഞു.
