കഴിഞ്ഞ ദിവസമാണ് രാജ്യത്തെ ഒരു പട്ടാള ക്യാംപിലേയ്ക്ക് വന്ന ഫോൺ വിളികള്‍ സംബന്ധിച്ച അന്വേഷണത്തിൽ കാടാമ്പുഴ സ്വദേശി ഇബ്രാഹിം പിടിയാലത്. ബെംഗളൂരുവിലെ സൈനിക കേന്ദ്രത്തിലേയ്ക്കും മിലിട്ടറി മൂവ്‍മെൻ്റ് കൺട്രോള്‍ ഓഫീസിലേയ്ക്കും ഇയാള്‍ വിളിച്ചിരുന്നുവെന്ന് മൊഴി ലഭിച്ചതായി മാതൃഭൂമി റിപ്പോര്‍ട്ട് ചെയ്തു. ഇയാളുടെ നേതൃത്വത്തിൽ ബെംഗളൂരുവിൽ പ്രവര്‍ത്തിച്ചിരുന്ന എക്സേഞ്ചിൽ നിന്ന് ലക്ഷക്കണക്കിന് രൂപ വില വരുന്ന ഉപകരണങ്ങളും പിടിച്ചെടുത്തിട്ടുണ്ട്. നോയിഡയിലും കശ്മീരിലും മാത്രം പത്തിലധികം സമാന്തര എക്സ്ചേഞ്ചുകള്‍ പ്രവര്‍ത്തിക്കുന്നുണ്ടെന്ന കണക്കുകൂട്ടലിലാണ് സെൻട്രൽ ഐബി.
Also Read:
പിടിയിലായ ഇബ്രാഹിമിൻ്റെ മൊഴിയുടെ അടിസ്ഥാനത്തിൽ നടത്തിയ അന്വേഷണത്തിലാണ് കോഴിക്കോട്ടു നിന്നും തൃശൂരു നിന്നും സമാന്തര എക്സ്ചേഞ്ച് നടത്താനായി ഉപയോഗിച്ചിരുന്ന ഉപകരണങ്ങള്‍ പിടിച്ചെടുത്തത്. മുൻപ് ഉത്തര്‍ പ്രദേശിൽ നിന്ന് കണ്ടെത്തിയ അതേ ഉപകരണങ്ങള്‍ തന്നെയാണ് ഇവിടെയും ഉണ്ടായിരുന്നതെന്നും ഇയാള്‍ക്ക് ഐഎസ്ഐയുമായി ബന്ധമുണ്ടെന്നുമാണ് അന്വേഷണ ഏജൻസികള്‍ വ്യക്തമാക്കുന്നത്. ഇബ്രാഹിം പോപ്പുലര്‍ ഫ്രണ്ട് ഓഫ് ഇന്ത്യ പ്രവര്‍ത്തകനാണെന്നും 2007ൽ കോട്ടയ്ക്കൽ പോലീസ് സ്റ്റേഷൻ ആക്രമിച്ച കേസിലെ പ്രതിയാണെന്നും റിപ്പോര്‍ട്ടിൽ പറയുന്നു.
Also Read:
കേരള പോലീസിനു പുറമെ കര്‍ണാടക പോലീസും സെൻട്രൽ ഐബിയും ദേശീയ അന്വേഷണ ഏജൻസിയും വിഷയത്തിൽ അന്വേഷണം നടത്തുന്നുണ്ട്. സൈനിക കേന്ദ്രങ്ങളിലേയ്ക്ക് നിയമവിരുദ്ധമായി പ്രവര്‍ത്തിക്കന്ന സ്ഥാപനത്തിൽ നിന്ന് ഫോൺ കോളുകള്‍ വന്ന സംഭവത്തെ അതീവഗൗരവത്തോടെയാണ് അന്വേഷണ ഏജൻസികള്‍ കാണുന്നത്. പ്രതിരോധ മന്ത്രാലയത്തിൽ നിന്നെന്നു പറഞ്ഞായിരുന്നു സൈനിക കേന്ദ്രങ്ങളിലെ ഉന്നത ഉദ്യോഗസ്ഥരെ ഇവര്‍ വിളിച്ചിരുന്നത്. ഹിന്ദിയിലും ഇംഗ്ലീഷിലും സംസാരിക്കുന്ന സംഘം ഉദ്യോഗസ്ഥരുടെ പേരും റാങ്കും സൂചിപ്പിക്കുകയും ചെയ്യും. പ്രധാന നമ്പറുകള്‍ക്കു പുറമെ ഉദ്യോഗസ്ഥരുടെ എക്സ്റ്റെൻഷൻ നമ്പറുകളിലും സംഘം വിളിച്ചിട്ടുണ്ട്.
ഇക്കാര്യം കശ്മീരിലെ മിലിട്ടറി ഇൻ്റലിജൻസ് യൂണിറ്റായിരുന്നു ആദ്യം കണ്ടെത്തിയത്. സൈനിക കേന്ദ്രത്തിലേയ്ക്ക് വന്ന ഫോൺ കോള്‍ ബെംഗളൂരുവിൽ നിന്നാണെന്നു കണ്ടെത്തുകയും തുടര്‍ന്ന് മിലിട്ടറി ഇൻ്റലിജൻസ് പ്രതി ഇബ്രാഹിമിനെ ബെംഗളൂരുവിൽ നിന്ന് അറസ്റ്റ് ചെയ്യുകയുമായിരുന്നു.
