കേസിലെ പ്രതിയായ വൈദികനെ വിവാഹം ചെയ്യാൻ അനുവദിക്കണമെന്ന് ആവശ്യപ്പെട്ട് ഇരയായ യുവതിയാണ് ആദ്യം കോടതിയെ സമീപിച്ചത്. പിന്നാലെ പ്രതി റോബിൻ വടക്കുഞ്ചേരിയും കോടതിയുടെ മുന്നിൽ വിവാഹത്തിന് സന്നദ്ധതയറിയിച്ച് ജാമ്യാപേക്ഷയുമായി എത്തി. കോടതി ഇന്ന് കേസ് പരിഗണിക്കാനിരിക്കേയാണ് മുതിര്‍ന്ന വൈദികൻ്റെ വാക്കുകള്‍.
“തികച്ചും അസാധാരണമായ കേസാണിത്. സാധാരണ ഒരു കേസ് ഇങ്ങനെ ഉണ്ടാകാറില്ല. ഇര തന്നെയാണ് കേസുമയി സുപ്രീം കോടതിയിൽ കേസുമായി എത്തിയത്. ചെയ്തത് തെറ്റല്ലെന്നോ അവരെ ശിക്ഷിക്കേണ്ടെന്നോ അല്ല ഞാൻ പറയുന്നത്. മറിച്ച് തെറ്റിന് അതീതമായി ചില സാധ്യതകുളണ്ട്. ആ സാധ്യതകളുമായി കോടതിയുടെ മുന്നിലെത്തുന്ന ഒരാളുടെ കഥയാണിത്.” ഫാ. പോള്‍ തേലക്കാട്ട് റിപ്പോര്‍ട്ടര്‍ ടിവിയോടു പറഞ്ഞു. നീതി നടത്താനുള്ളതാണ് നിയമമെന്നും എന്നാൽ നിയമം അതിൽത്തന്നെ നീതിയല്ലെന്നും ഫാ. തേലക്കാട്ട്പറഞ്ഞു. “നിയമത്തിന് അതീതമായി മനുഷ്യജീവിതത്തിന് സാധ്യതയുണ്ട് എന്നു ചൂണ്ടിക്കാണിക്കുന്ന കാര്യമാണിത്. ” വൈദികൻ കൂട്ടിച്ചേര്‍ത്തു.
കേസ് കോടതി ഫയലിൽ സ്വീകരിച്ചതു തന്നെ ഹര്‍ജിയുടെ പ്രാധാന്യം പരിഗണിച്ചാണെന്ന് വൈദികൻ പറഞ്ഞു. “നിയമത്തിൻ്റെ മണ്ഡലത്തിനു പുറത്തേയ്ക്ക് ഒരു ജീവിതമുണ്ട് കുറ്റവും ശിക്ഷയും മാത്രമല്ല ജീവിതം, അതിനപ്പുറവും ജവിതമുണ്ട്. ആ കാര്യങ്ങളും കോടതികള്‍ പരിഗണിക്കേണ്ടതുണ്ട്.” വൈദികൻ പറഞ്ഞു.
പ്രായപൂര്‍ത്തിയാകാത്ത പെൺകുട്ടിയെ പീഡിപ്പിച്ചു ഗര്‍ഭിണിയാക്കിയ കറ്റത്തിലാണ് വൈദികൻ ശിക്ഷിക്കപ്പെട്ടത്. പെൺകുട്ടിയെ രഹസ്യകേന്ദ്രത്തിലെത്തിച്ച് പ്രസവിക്കാനും കുട്ടിയെ അനാഥാലയത്തിലേയ്ക്ക് മാറ്റാനുമുള്ള ശ്രമം വലിയ വിവാദമായിരുന്നു. ശിക്ഷിക്കപ്പെട്ടതിനു പിന്നാലെ സഭ ഇയാളുടെ പൗരോഹിത്യം എടുത്തു നീക്കിയിരുന്നു. അതേസമയം, ഇന്ന് ഇരയുടെയും പ്രതിയുടെയും ഹര്‍ജികളെ കേരള സര്‍ക്കാര്‍ സുപ്രീം കോടതിയിൽ എതിര്‍ക്കും എന്നാണ് റിപ്പോര്‍ട്ടുകള്‍.
