കൊല്ലം: സ്ത്രീധന പീഡനത്തെത്തുടർന്ന് മരണപ്പെട്ട വിസ്മയയുടെ കേസ് വാദിക്കാൻ സ്പെഷ്യൽ പ്രോസിക്യൂട്ടറെ നിയമിച്ച് സംസ്ഥാന സർക്കാർ. കൊല്ലത്തെ പ്രമുഖ ക്രിമിനൽ അഭിഭാഷകനായ ജി മോഹൻ രാജിനെയാണ് സ്പെഷ്യ പ്രോസിക്യൂട്ടറായി നിയമിച്ചത്. വിവാദമായ അഞ്ചൽ ഉത്ര വധക്കേസിലെ സ്പെഷ്യൽ പ്രോസിക്യൂട്ടറാണ് ജി മോഹൻ രാജ്.
വിവാഹശേഷം അഞ്ച് തവണ വിസ്മയയെ മർദ്ദിച്ചെന്നാണ് കിരണിന്റെ മൊഴി. മരിച്ച ദിവസം മർദ്ദിച്ചില്ലെന്നും പ്രതി മൊഴി നൽകിയിട്ടുണ്ട്. വിസ്മയയുടെ സുഹൃത്തുക്കളുടേയും ബന്ധുക്കളുടേയും മൊഴി അന്വേഷണ സംഘം രേഖപ്പെടുത്തിയിട്ടുണ്ട്.
വിസ്മയയുടേത് ആത്മഹത്യയാണെന്ന സൂചനയാണ് പോസ്റ്റ്മോർട്ടം റിപ്പോർട്ട് നൽകുന്നത്. എന്നാൽ കൊലപാതകമാണോ ആത്മഹത്യയാണോ എന്നുള്ള അന്തിമ നിഗമനത്തിലേക്ക് പോലീസ് എത്തിയിട്ടില്ല.
മോഹൻ രാജിനെ സ്പെഷ്യൽ പ്രോസിക്യൂട്ടറായി നിയമിക്കണമെന്ന് വിസ്മയയുടെ കുടുംബം ആവശ്യപ്പെട്ടിരുന്നു. ഇക്കാര്യം ആവശ്യപ്പെട്ട് വിസ്മയയുടെ കുടുംബം മുഖ്യമന്ത്രിയെ നേരിൽ കണ്ടിരുന്നു. പോലീസ് നിർദ്ദേശിച്ച പട്ടികയിലും മോഹൻ രാജിനായിരുന്നു പരിഗണന.
