കേരളത്തിൽ നിന്നുള്ളവർക്ക് നിയന്ത്രണങ്ങളും നിർദേശവുമായി തമിഴ്നാട്; ആർടിപിസിആർ നെഗറ്റീവ് സർട്ടിഫിക്കറ്റ് നിർബന്ധം

ചെന്നൈ: കേസുകൾ ഉയർന്ന തോതിലുള്ള കേരളത്തിൽ നിന്നുള്ള യാത്രക്കാർക്ക് കർശന നിയന്ത്രണവുമായി തമിഴ്നാട്. കേരളത്തിൽ നിന്നുള്ളവർക്ക് സർട്ടിഫിക്കറ്റ് നിർബന്ധമാക്കുമെന്ന് തമിഴ്നാട് ആരോഗ്യ മന്ത്രി മാ. സുബ്രഹ്‌മണ്യം അറിയിച്ചു. കർണാടകയ്ക്ക് പിന്നാലെയാണ് തമിഴ്നാടും കേരളത്തിൽ നിന്നുള്ളവർക്ക് കർശന നിയന്ത്രണം ഏർപ്പെടുത്തുന്നത്.

ഓഗസ്റ്റ് അഞ്ച് മുതൽ മുതൽ നിർദേശങ്ങൾ പ്രാബല്യത്തിൽ വരും. രണ്ട് ഡോസ് വാക്സിൻ സ്വീകരിച്ച് 14 ദിവസം പിന്നിട്ടവർക്ക് ഇളവുകളുണ്ടാകും. 72 മണിക്കൂറിനുള്ളിൽ എടുത്ത ആർടിപിസിആർ നെഗറ്റീവ് പരിശോധനാ ഫലമാണ് കൈവശം സൂക്ഷിക്കേണ്ടത്. പരിശോധനാ ഫലമോ കൊവിഡ് പ്രതിരോധ വാക്സിൻ സ്വീകരിച്ചതിൻ്റെ സർട്ടിഫിക്കറ്റോ കൈവശമില്ലാത്തവർക്ക് ചെക്ക് പോസ്റ്റുകളിൽ പരിശോധനയുണ്ടാകും.

വിമാന യാത്രക്കാരെ തെർമർ സ്കാനറിലൂടെ പരിശോധിക്കും. രോഗ ലക്ഷണങ്ങൾ ഉള്ളവരെ അവിടെവച്ച് തന്നെ കൊവിഡ് പരിശോധനകൾക്ക് വിധേയമാക്കും. തമിഴ്നാട്ടിലേക്ക് പ്രവേശിക്കുന്ന വാളയാർ ഉൾപ്പെടെ കോയമ്പത്തൂരിലേക്ക് പ്രവേശിക്കാനുള്ള എല്ലാ ചെക്ക് പോസ്റ്റുകളിളും പരിശോധനയുണ്ടാകും.

കൊവിഡ് കേസുകൾ ഉയർന്ന തോതിലുള്ള കേരളം, മഹാരാഷ്ട്ര സംസ്ഥാനങ്ങളിൽ നിന്നുള്ളവർക്ക് ആർടിപിസിആർ നെഗറ്റീവ് സർട്ടിഫിക്കറ്റ് നിർബന്ധമാക്കിയിട്ടുണ്ട്. 72 മണിക്കൂറിനുള്ളിലെ സർട്ടിഫിക്കറ്റാണ് കൈവശം സൂക്ഷിക്കേണ്ടത്. ട്രെയിൻ മാർഗം എത്തുന്നവർക്കും ആർടിപിസി ആർ നെഗറ്റീവ് സർട്ടിഫിക്കറ്റ് നിർബന്ധമാണ്.

ആരോഗ്യ പ്രവർത്തകർ, മരണം, രണ്ട് വയസിന് താഴെയുള്ള കുട്ടുകൾക്കുള്ള അടിയന്തര ചികിത്സയ്ക്ക് എത്തുന്നവർക്ക് ആർടിപിസിആർ നെഗറ്റീവ് സർട്ടിഫിക്കറ്റ് ആവശ്യമില്ല. ദിവസേന പഠനത്തിൻ്റെ ഭാഗമായി എത്തുന്നവർക്കും ബിസിനസ് ആവശ്യങ്ങൾക്കായി എത്തുന്നവരും പതിനഞ്ച് ദിവസം കൂടുമ്പോൾ ആർടിപിസിആർ പരിശോധന നടത്തി സർട്ടിഫിക്കറ്റ് ഹാജരാക്കണം. ബസിൽ എത്തുന്നവരുടെ ആർടിപിസിആർ നെഗറ്റീവ് സർട്ടിഫിക്കറ്റ് പരിശോധിക്കേണ്ടത് കണ്ടക്ടർമാരുടെ ഉത്തരവാദിത്തമാണ്.