തിരുവനന്തപുരം: കോവിഡ് നിയന്ത്രണങ്ങളും ലോക്ഡൗണും തുടർന്നിട്ടും രോഗവ്യാപനം കുറയാത്ത സാഹചര്യത്തിൽ ബദൽ മാർഗം തേടി സംസ്ഥാന സർക്കാർ. അടച്ചിടുന്നതിന് പകരം മറ്റ് മാർഗങ്ങൾ തേടാനാണ് സർക്കാർ ആലോചിക്കുന്നത്. ടി.പി.ആർ അനുസരിച്ചുള്ള നിയന്ത്രണങ്ങൾ ഇനിയും തുടരേണ്ടതുണ്ടോ എന്ന് വെള്ളിയാഴ്ചത്തെഅവലോകനയോഗത്തിൽ മുഖ്യമന്ത്രി പിണറായി വിജയൻ ചോദിച്ചു.
ശാസ്ത്രീയമായ മറ്റ് മാർഗങ്ങൾ ആലോചിച്ച് റിപ്പോർട്ട് സമർപ്പിക്കണമെന്ന് മുഖ്യമന്ത്രി യോഗത്തിൽ നിർദേശിച്ചു. വിവിധ മേഖലയിലെ വിദഗ്ധരുമായി കൂടിയാലോചിച്ച് ഉചിതമായ പരിഹാരമാർഗം നിർദേശിക്കാനും മുഖ്യമന്ത്രി യോഗത്തിൽ ആവശ്യപ്പെട്ടു.ഒന്നാം തരംഗത്തിൽ രോഗികളുടെ എണ്ണം വർധിച്ചപ്പോൾ നടപ്പിലാക്കിയ മൈക്രോ കണ്ടൈൻമെന്റ് രീതി പ്രാബല്യത്തിൽ കൊണ്ടുവരാനും പ്രാദേശിക തലത്തിൽ നിയന്ത്രണം ശക്തമാക്കി രോഗവ്യാപനം പിടിച്ചുനിർത്താനുമാണ് ആലോചന.
രാജ്യത്ത് എല്ലാ സംസ്ഥാനങ്ങളിലും രോഗവ്യാപനം നിയന്ത്രണത്തിലായിട്ടും കേരളത്തിൽ വ്യാപന തോത് കുറഞ്ഞിട്ടില്ല. ഇപ്പോൾ രാജ്യത്ത് റിപ്പോർട്ട് ചെയ്യുന്നപ്രതിദിനകേസുകളിൽ 50 ശതമാനത്തോളം കേരളത്തിലാണെന്ന് കേന്ദ്രവും ചൂണ്ടിക്കാണിച്ചിരുന്നു. അശാസ്ത്രീയമായ ലോക്ഡൗൺ ഇളവുകളാണ് രോഗവ്യാപനത്തിന് കാരണമെന്നും ഇതിന് കാരണക്കാരായ ഉദ്യോഗസ്ഥർക്കെതിരെ നടപടി സ്വീകരിക്കണമെന്നുംകേന്ദ്ര ആരോഗ്യമന്ത്രാലയം അയച്ച കത്തിൽ വ്യക്തമാക്കിയിരുന്നു.
ഇതിന് പിന്നാലെയാണ് സംസ്ഥാനത്ത് രോഗവ്യാപനം നിയന്ത്രണത്തിലാക്കാൻ പുതിയ നിർദേശങ്ങൾ ഉണ്ടാകണമെന്ന് മുഖ്യമന്ത്രി ആവശ്യപ്പെട്ടത്. കേരളത്തിൽ രോഗികളുടെ എണ്ണം ഉയരുന്നത് പരിഗണിച്ച് സംസ്ഥാനത്തിന് കൂടുതൽ ഡോസ് വാക്സിൻ ആവശ്യപ്പെടാനും കേരളം ഒരുങ്ങുകയാണ്. ആഴ്ചയിൽ 25 ലക്ഷം എന്ന കണക്കിൽ സംസ്ഥാനത്ത് ഒരു മാസം ഒരു കോടി ഡോസ് വാക്സിൻ നൽകുന്നതിന് കേരളത്തിന് കഴിയുമെന്നും യോഗത്തിൽ മുഖ്യമന്ത്രി പറഞ്ഞു.
Content Highlights: CM Pinarayi wants to take quick decision in Lock down continuing in Kerala
