തിരുവനന്തപുരം: മിൽമയിൽ തിരഞ്ഞെടുക്കപ്പെട്ട ഭരണസമിതി നിലവിൽ വന്നതിന് ശേഷം ആദ്യമായി ഭരണം പിടിച്ച് ഇടതുപക്ഷം. ചെയർമാനായി മലബാർ മേഖലാ ക്ഷീരോത്പാദക യൂണിയൻ ചെയർമാൻ കെ.എസ്. മണിയെ തിരഞ്ഞെടുത്തു.1983ൽ ഭരണസമിതി നിലവിൽ വന്നത് മുതൽ കോൺഗ്രസ് ആയിരുന്നു ക്ഷീരോത്പാദക സഹകരണസംഘം ഭരിച്ചിരുന്നത്.
എൽ.ഡി.എഫിന് ഏഴ് വോട്ടുകൾ ലഭിച്ചപ്പോൾ യുഡിഎഫിന് അഞ്ച് വോട്ടുകൾ മാത്രമാണ് ലഭിച്ചത്. അഡ്മിനിസ്ട്രേറ്റീവ് കമ്മിറ്റിയിലേക്ക് നോമിനേറ്റ് ചെയ്യപ്പെട്ട മൂന്ന്വോട്ടും മലബാർ മേഖലയിൽ നിന്നുമുള്ള നാല് വോട്ടുമാണ് എൽഡിഎഫിന് ലഭിച്ചത്.
ഭരണം പിടിക്കുകയെന്നത് സി.പി.എമ്മിന്റെ ലക്ഷ്യമായിരുന്നു. ഇതിന്റെ ഭാഗമായി മലബാർ മേഖല ക്ഷീരോത്പാദക യൂണിയനിൽ ഭരണസമിതി പിരിച്ചുവിട്ട് ഉദ്യോഗസ്ഥഭരണം ഏർപ്പെടുത്തി. തുടർന്ന് തിരഞ്ഞെടുപ്പിൽ സി.പി.എം. പിടിച്ചെടുത്തു.
സമാനമായി കാലാവധി പൂർത്തിയാക്കാൻ അഞ്ചുദിവസം ബാക്കിനിൽക്കേ തിരുവനന്തപുരം മേഖലാ ക്ഷീരോത്പാദക യൂണിയൻ ഭരണസമിതി ഓർഡിനൻസിലൂടെ പിരിച്ചുവിട്ടു. തുടർന്ന് സി.പി.എമ്മിന്റെ നേതൃത്വത്തിലുള്ള അഡ്മിനിസ്ട്രേറ്റീവ് കമ്മിറ്റിക്ക് ഭരണവും നൽകി. ഈ സമിതിക്ക് വോട്ട് ചെയ്യാനുള്ള അവകാശവും നൽകി.
തിരഞ്ഞെടുപ്പ് നടത്തിയാൽ തിരുവനന്തപുരം മേഖല പിടിക്കാനാകുമെന്ന പ്രതീക്ഷയിലായിരുന്നു കോൺഗ്രസ്. 1983 മുതൽ 2019 വരെ 36 വർഷം കോൺഗ്രസ് നേതാവ് പ്രയാർ ഗോപാലകൃഷ്ണനായിരുന്നു മിൽമ ചെയർമാൻ. കഴിഞ്ഞ രണ്ട് വർഷമായി പി.എ. ബാലൻ മാസ്റ്റർ ആയിരുന്നു ചെയർമാൻ.
Content Highlights: Milma have an LDF chairman for the first time in history
