ന്യൂഡൽഹി: നിയമസഭാ കയ്യാങ്കളിക്കേസ് പിൻവലിക്കണമെന്നഹർജി തള്ളിയുള്ള സുപ്രീംകോടതിയുടെ വിധിപ്രസ്താവനത്തിൽ സർക്കാരിനെതിരേ അതിരൂക്ഷ പരാമർശങ്ങൾ. കേസ് പിൻവലിക്കാനുള്ള സംസ്ഥാന സർക്കാരിന്റെ അപേക്ഷ ജനങ്ങളോടുള്ള വഞ്ചനയാണെന്ന് കോടതി വിമർശിച്ചു. ജനപ്രതിനിധികൾക്കുള്ള പ്രത്യേക പരിരക്ഷ ക്രിമിനൽ കുറ്റത്തിൽ നിന്ന് രക്ഷപ്പെടാനുള്ള പരിരക്ഷയല്ലെന്നും കോടതിയുടെ വിധിപ്രസ്താവത്തിൽ പറയുന്നു.
ഭരണഘടന നൽകുന്ന അവകാശങ്ങളുടെ അതിർവരമ്പ് എംഎൽഎമാർ ലംഘിച്ചു. ജനപ്രതിനിധികൾക്കുള്ള പ്രത്യേക അവകാശങ്ങൾ അവരുടെ ഉത്തരവാദിത്തങ്ങൾ സഭയിൽ നിർഭയം നിർവഹിക്കുന്നതിനാണ്. ഈ അവകാശങ്ങൾ എംഎൽഎമാരെ പൊതുനിയമങ്ങളിൽ നിന്ന് ഒഴിവാകാനുള്ള കവാടമല്ല. പരിരക്ഷ ജനപ്രതിനിധികൾ എന്ന നിലയിൽ മാത്രമാണ്. ക്രിമിനിൽ നിയമങ്ങളിൽ നിന്ന് അംഗങ്ങൾക്ക് പരിരക്ഷയും അവകാശവും ഇല്ല.
പൊതുമുതൽ നശിപ്പിക്കുന്നത് അഭിപ്രായ സ്വാതന്ത്ര്യത്തിന്റെ പരിധിയിൽ ഉൾപ്പെടുത്താനാവില്ല. നിയമസഭാ നടപടികൾക്കിടെ ഇത്തരം സംഭവങ്ങളുണ്ടാകാൻ പാടില്ലായിരുന്നു. ഇത്തരം നടപടിക്കെതിരേ ശക്തമായ സന്ദേശം നൽകിയേ തീരു. എംഎൽഎമാരുടെ പ്രവൃത്തി ഭരണഘടനയെ ചവിട്ടി മെതിച്ചു. കേസ് പിൻവലിക്കുന്നത് പൊതുനീതിയുടെയും നയത്തിന്റെയും ലംഘനമാണെന്നും സുപ്രീംകോടതി ചൂണ്ടിക്കാട്ടി.
കേസ് പിൻവലിക്കാനുള്ള സർക്കാർ നടപടി തെറ്റാണ്. 184-ാം അനുച്ഛേദം തെറ്റായി വ്യാഖ്യാനിച്ചാണ് സംസ്ഥാന സർക്കാർ ഹർജി സമർപ്പിച്ചിരിക്കുന്നതെന്നും ജസ്റ്റിസ് ഡിവൈ ചന്ദ്രചൂഡ്, എംആർ ഷാ എന്നിവരടങ്ങിയ ബെഞ്ച് വ്യക്തമാക്കി.ഹർജി പിൻവലിക്കണമെന്ന് സർക്കാരിന് വേണ്ടി കോടതിയിൽ ആവശ്യപ്പെട്ട പബ്ലിക് പ്രോസിക്യൂട്ടർക്കറെയും കോടതി വിമർശിച്ചു. പ്രോസിക്യൂട്ടർ സ്വതന്ത്രമായാണ് പ്രവർത്തിക്കേണ്ടതെന്നും കോടതി നിരീക്ഷിച്ചു.
സംസ്ഥാന സർക്കാരിന്റെ ഹർജി കോടതി തള്ളിയതോടെ മന്ത്രി വി. ശിവൻകുട്ടി, ഇ.പി. ജയരാജൻ, കെ.ടി. ജലീൽ, കെ. കുഞ്ഞമ്മദ്, സി.കെ. സദാശിവൻ, കെ. അജിത് എന്നിവർ കേസിൽ വിചാരണ നേരിടേണ്ടി വരും.2015 മാർച്ച് 13-നാണ് വിവാദമായ നിയമസഭാ കയ്യാങ്കളി നടക്കുന്നത്. ബാർ കോഴ വിവാദത്തിൽ ഉൾപ്പെട്ട അന്നത്തെ ധനമന്ത്രി കെ.എം. മാണിയെ ബജറ്റ് അവതരിപ്പിക്കാൻ അനുവദിക്കില്ലെന്ന എൽ.ഡി.എഫ്. എം.എൽ.എമാരുടെ നിലപാടാണ് കയ്യാങ്കളിയിൽ കലാശിച്ചത്.
content highlights:supreme court verdict on kerala assembly ruckus case
