കഴിഞ്ഞ ദിവസമാണ് പാലാ രൂപത മെത്രാൻ മാര്‍ ജോസഫ് കല്ലറങ്ങാട്ട് വിവാദമായ പ്രഖ്യാപനം നടത്തിയത്. പാലാ രൂപതയുടെ കുടുംബവര്‍ഷം 2021നോട് അനുബന്ധിച്ചാണ് മെത്രാൻ 2000ത്തിനു ശേഷം വിവാഹിതരായി അഞ്ച് കുട്ടികളെങ്കിലുമുള്ള ദമ്പതികള്‍ക്ക് പ്രതിമാസം 1500 രൂപ ധനസഹായം പ്രഖ്യാപിച്ചത്. നാലാമത്തെ കുട്ടിയ്ക്കും തുടര്‍ന്നുള്ള കുട്ടികള്‍ക്കും സൗജന്യ എൻജിനീയറിങ് പഠനവും ആശുപത്രി ചെലവുകളും വഹിക്കുമെന്നും വാഗ്ദാനമുണ്ട്. പിന്നാലെ രൂപതയുടെ ഫേസ്ബുക്ക് പേജിലും ഇതു സംബന്ധിച്ച പോസ്റ്റ് പ്രത്യക്ഷപ്പെട്ടിരുന്നു. എന്നാൽ ജനസംഖ്യാ നിയന്ത്രണത്തിനായി വിവിധ സംസ്ഥാനങ്ങള്‍ നിയമനിര്‍മാണത്തിനു വരെ ഒരുങ്ങുന്ന സാഹചര്യത്തിൽ പാലാ രൂപതയുടെ നിലപാട് വലിയ വിവാദമാകുകയായിരുന്നു. ഇതിനു പിന്നാലെയാണ് വിഷയത്തിൽ വിശദമായ വാര്‍ത്താക്കുറിപ്പ് ഇറക്കുമെന്ന് രൂപത വ്യക്തമാക്കിയത്.
Also Read:
അംഗബലം കൂട്ടാനായി രൂപത പരസ്യമായി ആഹ്വാനം ചെയ്യുകയാണെന്നാണ് സമൂഹമാധ്യമങ്ങളിലെ വിമര്‍ശനം. അൽപം വകതിരിവ് വേണമെന്നു പറഞ്ഞു ഈ പോസ്റ്റര്‍ സംവിധായകൻ ജിയോ ബേബിയും പങ്കുവെച്ചിരുന്നു. ഇതിനു പിന്നാലെയാണ് പോസ്റ്റര്‍ അപ്രത്യക്ഷമായത്. സന്ദേശത്തിലെ അവ്യക്തതയാണ് വിവാദത്തിനു കാരണമെന്നും മെത്രാൻ തന്നെ ഔദ്യോഗിക വിശദീകരണം ഇറക്കുമെന്നും രൂപത വക്താവ് അറിയിച്ചതായി ഏഷ്യാനെറ്റ് ന്യൂസ് റിപ്പോര്‍ട്ട് ചെയ്തു. അതേസമയം, തീരുമാനത്തിൽ നിന്ന് രൂപത പിന്നോട്ടു പോകില്ലെന്നാണ് രൂപതയുടെ നിലപാട് എന്നും പൂർണമായും ക്രിസ്ത്യൻ തത്വങ്ങളിൽ ഉറച്ചു നിന്നുകൊണ്ടുള്ള പ്രഖ്യാപനമാണ് ഇതെന്നും റിപ്പോര്‍ട്ടിൽ പറയുന്നുണ്ട്.
Also Read:
അതേസമയം, ജനസംഖ്യാ വര്‍ദ്ധനവ് സംബന്ധിച്ച പാലാ രൂപതയുടെ പ്രഖ്യാപനത്തിനൊപ്പം 2015ൽ ഫ്രാൻസിസ് മാര്‍പാപ്പ നടത്തിയ പ്രസ്താവനയും ചര്‍ച്ചയായിട്ടുണ്ട്. കത്തോലിക്കര്‍ മുയലുകളെപ്പോലെ പെറ്റുപെരുകേണ്ടതില്ലെന്നും ഉത്തരവാദിത്തമുള്ള രക്ഷകര്‍ത്താക്കളാകുകയാണ് വേണ്ടതെന്നുമായിരുന്നു മാര്‍പാപ്പ പറഞ്ഞത്. എന്നാൽ കൃത്രിമ ഗര്‍ഭനിരോധന മാര്‍ഗങ്ങളോടും ഗര്‍ഭഛിദ്രത്തോടും കടുത്ത എതിര്‍പ്പാണ് മാര്‍പാപ്പയ്ക്കും കത്തോലിക്കാ സഭയ്ക്കും ഉള്ളത്.
