ശബരിമലയില്‍ മേല്‍ശാന്തി നിയമനത്തില്‍ ‘മലയാളി ബ്രാഹ്മണരെ’ മാത്രം ക്ഷണിച്ചുകൊണ്ടുള്ള ദേവസ്വം ബോര്‍ഡിന്‍റെ തീരുമാനം വിവാദത്തില്‍.
മേല്‍ശാന്തി നിയമനത്തിലെ ജാതി വിവേചനം ഒഴിവാക്കണമെന്ന് ബി.ജെ.പിയുടെ ഘടകകക്ഷിയായ ബി.ഡി.ജെ.എസിന്റെ അധ്യക്ഷന്‍ തുഷാര്‍ വെള്ളാപ്പള്ളി ആവശ്യപ്പെട്ടു. ബി.ഡി.ജെ.എസ് വളരെക്കാലമായി ഈ ആവശ്യം സജീവമായി ഉന്നയിക്കുന്നുണ്ടെങ്കിലും ബി.ജെ.പി ഈ ആവശ്യത്തെ പിന്തുണയ്ക്കുന്നില്ല.
എന്നാല്‍, ബ്രാഹ്മണര്‍ പൂജ ചെയ്യുന്ന സമ്പ്രദായമാണ് ശബരിമലയില്‍ നിലവിലുള്ളതെന്നും എല്ലാവരുമായി ചര്‍ച്ച ചെയ്ത് മാറ്റം വരുത്തണോ എന്ന് ആലോചിക്കാമെന്നുമാണ് ദേവസ്വം ബോര്‍ഡ് പ്രസിഡന്റ് എന്‍. വാസു വിവിധ മാധ്യമങ്ങളോട് പറഞ്ഞത്.
വളരെ ഗൗരവവും വിവാദവുമായ ഈ വിഷയത്തില്‍ ദേവസ്വംബോര്‍ഡ് സ്വയം തീരുമാനമെടുക്കില്ല. ക്ഷേത്രത്തില്‍ ബ്രാഹ്മണരായ ശാന്തിമാരായി നിയമിക്കുന്നതിനുള്ള ഹൈക്കോടതി അംഗീകാരത്തെ പിന്തുടരുകയാണ് നിലവില്‍ ബോര്‍ഡ് ചെയ്യുന്നതെന്നും അദ്ദേഹം ചൂണ്ടിക്കാട്ടി.
ഏഴ് അബ്രാഹ്മണ പൂജാരിമാരുടെ അപേക്ഷകളാണ് തിരുവിതാംകൂര്‍ ദേവസ്വം ബോര്‍ഡ് നിരസിച്ചത്. അപേക്ഷാ ഫീസായ 2,500 രൂപയും ഇവര്‍ക്ക് മടക്കി നല്‍കിയിട്ടുണ്ട്. ഇതേത്തുടര്‍ന്ന് സിജിത്ത് ടി.എല്‍, വിജീഷ് പി.ആര്‍ എന്നിവര്‍ ഹൈക്കോടതിയെ സമീപിച്ചിട്ടുണ്ട്. അഭിഭാഷകനായ ടി.ആര്‍ രാജേഷ് മുഖേനയാണ് ഇരുവരും ഹര്‍ജി സമര്‍പ്പിച്ചിരിക്കുന്നത്.
‘ശബരിമലയിലും മാളികപ്പുറത്തും മേല്‍ശാന്തിക്കായുള്ള അപേക്ഷ മലയാള ബ്രാഹ്മണന് മാത്രമേ സമര്‍പ്പിക്കാന്‍ കഴിയുകയുള്ളു എന്ന വിജ്ഞാപനം ഇന്ത്യന്‍ ഭരണഘടനയിലെ ആര്‍ട്ടിക്കിള്‍ 14, 15, 16 പ്രകാരം മൗലികാവകാശത്തിന്റെ ലംഘനമാണ്’– ഹര്‍ജിയില്‍ പരാമര്‍ശിക്കുന്നതായി വിവിധ മാധ്യമങ്ങള്‍ റിപ്പോര്‍ട്ട് ചെയ്തു.
‘കേരളത്തിലെ രണ്ട് പ്രധാന ക്ഷേത്രങ്ങളിലെ മേല്‍ശാന്തികമാരാണ് ഹര്‍ജിക്കാര്‍. ദേവസ്വം ബോര്‍ഡിന് കീഴിലുള്ള ഏത് ക്ഷേത്രങ്ങളിലും മേല്‍ശാന്തികളായി സേവനമനുഷ്ഠിക്കാനുള്ള പൂര്‍ണ യോഗ്യത ഹര്‍ജിക്കാര്‍ക്ക് ഉണ്ട്. കേരളത്തിലെ പ്രധാന ക്ഷേത്രങ്ങളില്‍ പൂജകള്‍ അര്‍പ്പിക്കാന്‍ ആവശ്യമായ പൂജകള്‍, മന്ത്രങ്ങള്‍ എന്നിവയില്‍ അവര്‍ നൈപുണ്യമുള്ളവരാണ്. നിലവില്‍ തിരുവിതാംകൂര്‍ ദേവസ്വം ബോര്‍ഡ് പുറത്തിറക്കിയ വിജ്ഞാപനത്തില്‍ അവര്‍ ദു:ഖിതരാണ്.’ — ഹര്‍ജിയില്‍ പറഞ്ഞു.
‘ശ്രീനാരായണ ഗുരുദേവന്‍ ദീപപ്രതിഷ്ഠ നിര്‍വഹിച്ച ശിവഗിരിമഠത്തിനു കീഴിലെ കാരമുക്ക് ചിദംബര ക്ഷേത്രത്തിലെ മേല്‍ശാന്തിയാണ് ടി.എല്‍ സിജിത്ത്. ശിവഗിരി ശ്രീനാരായണ ധര്‍മ്മസംഘം ട്രസ്റ്റ് പരിചയ സര്‍ട്ടിഫിക്കറ്റ് ലഭിച്ച വ്യക്തിയാണ് ഹര്‍ജിക്കാരില്‍ ഒരാളായ സിജിത്ത്. ശാന്തി നിയമനങ്ങള്‍ക്ക് എകസ്പീരിയന്‍സ് സര്‍ട്ടിഫിക്കറ്റ് നല്‍കാന്‍ ദേവസ്വം ബോര്‍ഡ് അംഗീകരിച്ച സ്ഥാപനം കൂടിയാണ് ശിവഗിരിമഠം.’ — ഇന്ത്യടുഡേ റിപ്പോര്‍ട്ട് ചെയ്യുന്നു.
വിവിധ മാധ്യമങ്ങള്‍ റിപ്പോര്‍ട്ട് ചെയ്തതനുസരിച്ച്, 2018ല്‍ കോട്ടയം സ്വദേശിയായ സി.വി വിഷ്ണു നാരായണനും സമാന വിഷയത്തില്‍ പ്രതിഷേധവുമായി രംഗത്ത് വന്നിരുന്നു. മലയാള ബ്രാഹ്മണര്‍ക്ക് മാത്രമായി ശബരിമല, മാളികപ്പുറം മേല്‍ശാന്തി നിയമനം സംവരണം ചെയ്തതിനെതിരെ അദ്ദേഹം ഹൈക്കോടതിയില്‍ ഹര്‍ജി നല്‍കി. ജാതി നോക്കാതെ യോഗ്യരായവരെ തെരഞ്ഞെടുത്ത് മേല്‍ശാന്തിയായി നിയമിക്കണമെന്ന് ഹര്‍ജിയില്‍ വിഷ്ണു ആവശ്യപ്പെട്ടിരുന്നു.
മലയാള ബ്രാഹ്മണര്‍ക്കു മാത്രമായി മേല്‍ശാന്തി സംവരണം നല്‍കുന്നത് ഭരണഘടനാ വിരുദ്ധമാണെന്ന് ഹര്‍ജിയില്‍ പറഞ്ഞിരുന്നു.
പള്ളത്ത് എസ്.എന്‍.ഡി.പിക്ക് കീഴിലുള്ള സുബ്രഹ്മണ്യ ക്ഷേത്രത്തിലെ മേല്‍ശാന്തിയും ഈഴവ സമുദായാംഗവുമാണ് വിഷ്ണുനാരായണന്‍. അദ്ദേഹം 2002ലെ സുപ്രീംകോടതിയുടെ നിര്‍ണായക വിധിയുടെ പിന്‍ബലത്തിലായിരുന്നു നിയമനത്തിന് അപേക്ഷിച്ചിരുന്നത്. എന്നാല്‍ ഈ അപേക്ഷ നിരസിക്കുകയാണ് ചെയ്തത്.
അതേസമയം ‘ജാതി, ജനനം തുടങ്ങിയ മാനദണ്ഡങ്ങള്‍ അടിസ്ഥാനമാക്കി ക്ഷേത്രങ്ങളില്‍ പൂജാരിമാരെ നിയമിക്കുന്നത് ഇന്ത്യന്‍ ഭരണഘടനയുടെ ആര്‍ട്ടിക്കിള്‍ 16 നെ വ്രണപ്പെടുത്തന്നതാണെന്ന് സുപ്രീം കോടതി നേരത്തെ വിലയിരുത്തിയിരുന്നു.’— ഇന്ത്യ ടിവി റിപ്പോര്‍ട്ട് ചെയ്തു.
ശാന്തി നിയമനത്തില്‍ ജാതി യോഗ്യതയായി കണക്കാന്‍ കഴിയില്ലെന്നും ബ്രാഹ്മണരെ മാത്രം ഈ തസ്തികയിലേക്ക് പരിഗണിക്കാനാകില്ലെന്നും ആയിരുന്നു കോടതി വിധി പ്രസ്താവിച്ചത്.
2002ല്‍ ആദിത്യന്‍ Vs തിരുവിതാംകൂര്‍ ദേവസ്വം ബോര്‍ഡ് കേസിലാണ് ആ സുപ്രാന വിധി സുപ്രീം കോടതി പുറപ്പെടുവിച്ചത്. ജാതി അടിസ്ഥാനമാക്കി ബ്രാഹ്മണരെ മാത്രം പൂജാരികളാക്കുന്നത് ഭരണഘടന ഉറപ്പുനല്‍കുന്ന മനുഷ്യാവകാശത്തിന്റെയും സാമൂഹിക സമത്വത്തിന്റെയും ലംഘനമാണെന്ന് ഈ വിധിയിലൂടെ സുപ്രീം കോടതി ചൂണ്ടിക്കാട്ടി.
മാത്രമല്ല, 2014ല്‍ ദേവസ്വങ്ങളിലെ നിയമനങ്ങളില്‍ ജാതിപരിഗണന പാടില്ലെന്ന് കേരള സര്‍ക്കാരും ഉത്തരവിറക്കിയിട്ടുണ്ട്.
2002ലെ സുപ്രീം കോടതി വിധിയ്ക്ക് ശേഷം തിരുവിതാംകൂര്‍ ദേവസ്വം ബോര്‍ഡ് നിരവധി അബ്രാഹ്മണരെ നിയമിച്ചിട്ടുണ്ട്. 2017 ല്‍ സി.പി.എമ്മിന്റെ നേതൃത്വത്തിലുള്ള സര്‍ക്കാര്‍ ദേവസ്വത്തിന് കീഴിലുള്ള ക്ഷേത്രങ്ങളില്‍ അബ്രാഹ്മണരായ പൂജാരിമാരെ നിയമിക്കാനുള്ള തീരുമാനം എടുക്കുകയും ആറ് ദളിതര്‍ ഉള്‍പ്പെടെ 36 ബ്രാഹ്മണരല്ലാത്തവരെ നിയമിക്കുകയും ചെയ്തിരുന്നു. പൂജാരിമാരെ തെരഞ്ഞെടുക്കുന്നതിനുള്ള പ്രധാന പരിഗണന ജാതിയല്ലെന്നും ആചാരാനുഷ്ഠാനങ്ങളില്‍ ഉള്ള അറിവാണെന്നും അന്ന് എല്‍.ഡി.എഫ് അഭിപ്രായപ്പെട്ടിരുന്നു.
എന്നിരുന്നാലും ശബരിമലയില്‍ മാത്രം ഇപ്പോഴും മലയാളി ബ്രാഹ്മണന് എന്ന നിബന്ധന വയ്ക്കുന്നുണ്ട്. ശബരിമലയിലേക്കും മാളികപ്പുറം ക്ഷേത്രത്തിലേക്കുമുള്ള മേല്‍ശാന്തി നിയമനത്തിന് ദേവസ്വംബോര്‍ഡ് ഇറക്കിയ വിജ്ഞാപനം ഇത് തെളിയിക്കുന്നു. ഇക്കാര്യത്തില്‍ എല്‍.ഡി.എഫ് സര്‍ക്കാരും മൗനത്തിലാണ്.
‘മലയാള ബ്രാഹ്മണന്’ എന്ന പദപ്രയോഗത്തിലൂടെ ദേവസ്വം ബോര്‍ഡ് അര്‍ത്ഥമാക്കുന്ന മറ്റൊരു കാര്യം കൂടിയുണ്ട്. മലയാളിയല്ലാത്ത ബ്രാഹ്മണന് അതായത് മറ്റു സംസ്ഥാനത്തു നിന്നുള്ള ബ്രാഹ്മണന്‍മാരും അപേക്ഷ അയക്കേണ്ടതില്ല എന്നാണ് അതിനര്‍ത്ഥം.
‘മലയാള ബ്രാഹ്മണന്’ വന്നവഴി
2002ലാണ് ശബരിമല മേല്‍ശാന്തി നിയമനത്തില്‍ മലയാള ബ്രാഹ്മണനെന്ന വ്യവസ്ഥ ഉള്‍പ്പെടുത്തിയിരുന്നത്. നേരത്തെ 1979ല്‍ ശബരിമല മേല്‍ശാന്തി ഇന്റര്‍വ്യൂവില്‍ ഈഴവ സമുദായാംഗവും പ്രശസ്ത തന്ത്രിയുമായ പരേതനായ മാത്താനം വിജയന്‍ തന്ത്രി പങ്കെടുത്തിട്ടുണ്ട്.
‘പന്തളം രാജകുടുംബം മേല്‍ശാന്തി തിരഞ്ഞെടുപ്പ് കമ്മിറ്റി അംഗത്വവുമായി ബന്ധപ്പെട്ട് നടന്ന പ്രശ്നങ്ങളെ തുടര്‍ന്ന് ഹൈക്കോടതിയാണ് മേല്‍ശാന്തി നിയമനത്തില്‍ ചില മാനദണ്ഡങ്ങള്‍ക്ക് ഉത്തരവിട്ടത്. എന്നാല്‍ ജാതി ഒരു മാനദണ്ഡമായി ഉള്‍കൊള്ളിക്കാന്‍ കോടതി ആവശ്യപ്പെട്ടിരുന്നില്ലെങ്കിലും ബോര്‍ഡിലെ ചിലര്‍ മലയാള ബ്രാഹ്മണന് എന്ന വ്യവസ്ഥ ഒന്നാമത്തെ മാനദണ്ഡമാക്കി.’ — ഒരു കേരള കൗമുദി റിപ്പോര്‍ട്ട് ചൂണ്ടിക്കാണിക്കുന്നു.
2002 ജൂലായ് 27ന് ഹൈക്കോടതിയില്‍ സമര്‍പ്പിച്ച ഈ പട്ടികയില്‍ 18 മാനദണ്ഡങ്ങളായിരുന്നു ഉണ്ടായിരുന്നതെന്നും 2002 ഒക്ടോബര്‍ മൂന്നിന് ആദിത്യന്‍ കേസില്‍ സുപ്രീംകോടതി ചരിത്ര വിധി പറഞ്ഞപ്പോള്‍ ഈ മാനദണ്ഡം കാലഹരണപ്പെട്ടതാണെന്നും കേരള കൗമുദി റിപ്പോര്‍ട്ടില്‍ ചൂണ്ടിക്കാട്ടി.
വര്‍ഷങ്ങള്‍ പിന്നിട്ടിട്ടും സുപ്രീംകോടതി വിധി അംഗീകരിക്കാന്‍ ബോര്‍ഡ് തയ്യാറായിട്ടില്ലെന്ന് തന്നെയാണ് പുതിയ വിജ്ഞാപനത്തിലൂടെ മനസിലാക്കേണ്ടത്. .
സ്ത്രീ പ്രവേശനവുമായി ബന്ധപ്പെട്ട് 2018 മുതല്‍ ശബരിമല ഒരു ചര്‍ച്ചാ വിഷയമാണ്. തെരഞ്ഞെടുപ്പ് സമയത്ത് ബി.ജെ.പി, കോണ്‍ഗ്രസ് തുടങ്ങിയ പ്രതിക്ഷ പാര്‍ട്ടികള്‍ ഈ വിഷയം ഉന്നയിച്ച് വോട്ട് തേടാനുള്ള ശ്രമം നടത്തിയിരുന്നു.
****
