കൊച്ചി: കണ്ണൂരിൽ അപൂർവ്വ രോഗം ബാധിച്ച കുരുന്നിന്റെ ചികിത്സയ്ക്കായി സുമനസുകൾ നൽകിയത് 46.78 കോടി രൂപ. 7.77 ലക്ഷം പേരാണ് ഒന്നരവയസുകാരനായ മുഹമ്മദിനെ സഹായിക്കാൻ പണം അയച്ചത്. അടുത്ത മാസം ആറിന് കുഞ്ഞിനുള്ള മരുന്ന് വീട്ടിലെത്തും. ശേഷിക്കുന്ന തുക ബാധിച്ച മറ്റുകുട്ടികളുടെ കുടുംബത്തിന് നൽകുമെന്ന് മുഹമ്മദിന്റെ കുടുംബം വ്യക്തമാക്കി.
രണ്ട് വയസാകുന്നതിനു മുമ്പ് സോള്‍ജെന്‍സ്മാ എന്ന മരുന്ന് നൽകിയാൽ മുഹമ്മദിന്റെ രോഗം ഭേദമാകുമെന്നാണ് ഡോക്ടർമാർ പറയുന്നത്. മരുന്നിന് പതിനെട്ട് കോടി രൂപയാണ് വേണ്ടിയിരുന്നത്. ചികിത്സാ സഹായ സമിതിയാണ് കണക്ക് പുറത്തുവിട്ടത്.
കുരുന്നിന്റെ മരുന്നിനുള്ള പണം കണ്ടെത്താൻ കേരളക്കരയിലെ സുമനസുകൾ കൈകോർത്തതോടെയാണ് പണം സ്വരൂപിക്കാനായത്. മുഹമ്മദിന്റെ മൂത്ത സഹോദരി അഫ്രയ്ക്കും ഇതേ രോഗമാണ്. പതിനാല് കൊല്ലമായി വീൽചെയറിൽ കഴിയുകയാണ് അഫ്ര.
