തിരുവനന്തപുരം
സംസ്ഥാനത്ത് 50 ശതമാനത്തിനും ഇതുവരെ കോവിഡ് ബാധിച്ചിട്ടില്ലെന്ന് ഇന്ത്യൻ കൗൺസിൽ ഓഫ് മെഡിക്കൽ റിസർച്ച് (ഐസിഎംആർ). ജൂൺ അവസാനവും ജൂലൈ ആദ്യവുമായി നടത്തിയ നാലാമത് സിറോ പ്രിവലൻസ് പഠന റിപ്പോർട്ടിലാണ് ഇക്കാര്യം. തൃശൂർ, പാലക്കാട്, എറണാകുളം ജില്ലകളിലായിരുന്നു പഠനം. 42.7 ശതമാനം പേരിലും ആന്റിബോഡി കണ്ടെത്തി. അതായത്, 50 ശതമാനത്തിനും കോവിഡ് വരാൻ ഇനിയും സാധ്യതയുണ്ട്.
രാജ്യത്ത് 67.6 ശതമാനം പേർക്കാണ് രോഗം വന്നുപോയത്. രാജ്യത്ത് മൂന്നിൽ രണ്ടു പേർക്ക് രോഗം വന്നു പോയി/ വാക്സിൻവഴി രോഗപ്രതിരോധം കൈവരിച്ചെന്നാണ് ഇത് സൂചിപ്പിക്കുന്നത്. രാജ്യത്ത് 28ൽ ഒരാൾക്ക് രോഗം കണ്ടെത്തുമ്പോൾ കേരളത്തിൽ അത് അഞ്ചിൽ ഒന്നാണെന്ന് മുഖ്യമന്ത്രി പിണറായി വിജയൻ പറഞ്ഞു. സംസ്ഥാനത്തെ പരിശോധനാരീതി ശരിയായ ദിശയിലാണെന്നാണ് ഇത് സൂചിപ്പിക്കുന്നത്. തെരഞ്ഞെടുക്കപ്പെട്ടവരുടെ രക്തത്തിലുള്ള ആന്റിബോഡി സാന്നിധ്യം നിർണയിക്കുകയാണ് സിറോ പ്രിവലൻസ് സർവേയിലൂടെ നടത്തുന്നത്. രോഗം വന്ന് ഭേദമായവരിലും വാക്സിൻ സ്വീകരിച്ചവരിലും കോവിഡ് വൈറസിനെതിരായ ആന്റിബോഡിയുണ്ടാകും.
സിറോ പ്രിവലൻസ് പഠനത്തിലൂടെ സമൂഹത്തിൽ എത്ര ശതമാനത്തിന് രോഗപ്രതിരോധശേഷി ആർജിക്കാൻ കഴിഞ്ഞെന്ന് കണ്ടെത്താനാകും. 21 സംസ്ഥാനത്തിലെ 70 ജില്ലയിലായി 100 ആരോഗ്യപ്രവർത്തകരടക്കം ശരാശരി 400 പേരെ ഓരോ ജില്ലയിൽനിന്ന് പരിശോധനയുടെ ഭാഗമാക്കി. ആറു വയസ്സിനു മുകളിലുള്ള 28,975 പേരിലാണ് പരിശോധന നടത്തിയത്.
