കൊടകരയിലെ മൂന്നര കോടി രൂപ ബിജെപിയുടെ തെരഞ്ഞെടുപ്പ് ഫണ്ടാണെന്ന് തന്നെയാണ് കുറ്റപത്രത്തിലും ഉള്ളതെന്നാണ് റിപ്പോർട്ടുകൾ പറയുന്നത്. 22 അംഗ ക്രിമിനൽ സംഘത്തിനെതിരെയാണ് അന്വേഷണ സംഘത്തിന്‍റെ കുറ്റപത്രം. ആകെ 200 സാക്ഷികളാണ് കേസിലുള്ളത്.
അതേസമയം അന്വേഷണ സംഘം കുറ്റപത്രം സമർപ്പിക്കാൻ തയ്യാറെടുക്കവെ ഹൈക്കോടതിയുടെ ചില പരാമർശങ്ങളും ചർച്ചയായിരുന്നു. കവർച്ച ആകസ്മികമായി സംഭവിച്ചതല്ല, കൃത്യമായി ആസൂത്രണം ചെയ്തതാണെന്നായിരുന്നു കോടതിയുടെ നിരീക്ഷണം. ഒരുപാട് നിഗൂഢമായ കാര്യങ്ങൾ പുറത്ത് വരാനുണ്ടെന്നും ഹൈക്കോടതി പറഞ്ഞിരുന്നു.
സംസ്ഥാനത്ത് നിയമസഭ തെരഞ്ഞെടുപ്പ് നടക്കുന്നതിന് ദിവസങ്ങൾക്ക് മുൻപ് ഏപ്രിൽ മൂന്നിനാണ് കൊടകര ദേശീയപാതയിൽ മൂന്നരക്കോടി രൂപ ഒരുസംഘം കവർന്നത്. ഇതിൽ ഒരു കോടി 45 ലക്ഷം രൂപ അന്വേഷണ സംഘം കണ്ടെടുത്തിരുന്നു. ഇരിങ്ങാലക്കുട കോടതിയിലാണ് അന്വേണ സംഘം ഇന്ന് കുറ്റപത്രം സമർപ്പിക്കുക.
കേസിൽ അറസ്റ്റിലായ പ്രതികള്‍ ഇപ്പോഴും റിമാന്‍ഡിലാണ്. ഞായറാഴ്ചയ്ക്കു മുമ്പ് കുറ്റപത്രം സമര്‍പ്പിച്ചില്ലെങ്കില്‍ പ്രതികള്‍ക്കു ജാമ്യം ലഭിക്കാന്‍ സാധ്യതയുണ്ട്. അതുകൊണ്ടാണ്, കുറ്റപത്രം ഇന്ന് സമര്‍പ്പിക്കുന്നത്.
