ടൂറിസം മേഖലയിൽ മാസ് വാക്‌സിനേഷന്‍ ഡ്രൈവിന് തുടക്കം; കൊച്ചിയിൽ 2500 പേര്‍ വാക്‌സിന്‍ സ്വീകരിക്കും

എറണാകുളം: കൊച്ചിയിലെ ടൂറിസം മേഖലയിൽ പ്രവർത്തിക്കുന്നവർക്ക് മാസ് വാക്സിനേഷൻ ഡ്രൈവുമായി ജില്ലാ ഭരണകൂടവും ആരോഗ്യവകുപ്പും. വ്യാഴം, വെള്ളി, ശനി ദിവസങ്ങളിലായാണ് ക്യാമ്പ് സംഘടിപ്പിച്ചിരിക്കുന്നത്. മാസ് വാക്സിനേഷൻ ഡ്രൈവ് കൊച്ചി മേയർ എം അനിൽ കുമാറും ജില്ലാ കളക്ടർ ജാഫർ മാലികും ചേർന്ന് ഉദ്ഘാടനം ചെയ്തു. മരട് ബി ടി എച്ച് സരോവരത്തിൽ മൂന്ന് ദിവസങ്ങളിലായാണ് ക്യാമ്പ് സംഘടിപ്പിക്കുന്നത്. ക്യാമ്പിൽ ജില്ലയിലെ ടൂറിസം മേഖലയുമായി ബന്ധപ്പെട്ട് പ്രവർത്തിക്കുന്ന രണ്ടായിരത്തി അഞ്ഞൂറോളം പേർക്ക് വാക്സിനേഷൻ നൽകാൻ കഴിയുമെന്ന് കരുതുന്നതായി ജില്ലാ വാക്സിനേഷൻ നോഡൽ ഓഫീസർ എസ് ശിവദാസ് മാതൃഭൂമി ഡോട്ട് കോമിനോട് പറഞ്ഞു. ടൂറിസം മേഖലയിലെ എല്ലാവർക്കും വാക്സിനേഷൻ നൽകുകയെന്ന ലക്ഷ്യത്തോടെ സംസ്ഥാന വ്യാപകമായി നടത്തുന്ന വാക്സിനേഷൻ ഡ്രൈവ് ടൂറിസം കേന്ദ്രങ്ങളെ സമ്പൂർണ വാക്സിനേറ്റഡ് മേഖലകളാക്കി മാറ്റും. പുനരുജ്ജീവന പദ്ധതികളുടെ ഭാഗമായാണ് ഡ്രൈവ് സംഘടിപ്പിച്ചിരിക്കുന്നത്. കെടിഎം സൊസൈറ്റിയുടെയും ജില്ലാ ഭരണകൂടത്തിന്റെയും ആരോഗ്യ വകുപ്പിന്റെയും സഹകരണത്തോടെയാണ് വാക്സിനേഷൻ ക്യാമ്പ് സംഘടിപ്പിക്കുന്നത്. ടൂർ ഓപ്പറേറ്റർമാർ, ഫ്രണ്ട് ലൈൻ തൊഴിലാളികൾ, ടൂറിസം രംഗത്ത് പ്രവർത്തിക്കുന്നവർ, ഹോട്ടലുകൾ, റെസ്റ്റോറന്റുകൾ, ടൂറിസ്റ്റ് ടാക്സി ഡ്രൈവർമാർ, ടൂർ ഗൈഡുകൾ, ഹൗസ് ബോട്ടുകൾ, ഹോംസ്റ്റേകൾ, സർവീസ്ഡ് വില്ലകൾ തുടങ്ങിയവർ ഉൾപ്പെടുന്ന ടൂറിസം മേഖയിലുള്ളവർക്കായി കേരളത്തിലെ എല്ലാ ജില്ലകളിലും 2021 ജൂലൈ 31 ന് മുമ്പ് വാക്സിനേഷൻ ഡ്രൈവ് നടത്തും. Content Highlights:mega vaccination drive for tourism faculties