ലീഡ്സ്
ആദ്യ ട്വന്റി–-20യിലെ മിന്നുന്ന പ്രകടനം ആവർത്തിക്കാൻ പാകിസ്ഥാന് കഴിഞ്ഞില്ല. ഇംഗ്ലണ്ട് തിരിച്ചടിച്ചപ്പോൾ 45 റണ്ണിനായിരുന്നു പാകിസ്ഥാന്റെ തോൽവി. ആദ്യം ബാറ്റ് ചെയ്ത ഇംഗ്ലണ്ട് 19.5 ഓവറിൽ 200ന് പുറത്തായി. പാകിസ്ഥാന് 9–-155ൽ എത്താനേ കഴിഞ്ഞുള്ളൂ. സ്പിന്നർമാരുടെ പ്രകടനമാണ് ഇംഗ്ലണ്ടിനെ തുണച്ചത്. ആദിൽ റഷീദ്, മൊയീൻ അലി, മാർക് പാർക്കിൻസൺ എന്നിവർ ചേർന്ന് പാകിസ്ഥാന്റെ അഞ്ച് വിക്കറ്റാണ് വീഴ്ത്തിയത്. പേസർ സാക്കിബ് മഹ്മൂദ് മൂന്ന് വിക്കറ്റ് നേടി.
മുപ്പത്തേഴു റണ്ണെടുത്ത മുഹമ്മദ് റിസ്വാനാണ് പാകിസ്ഥാന്റെ ടോപ് സ്കോറർ. ഷദാബ് ഖാൻ 22 പന്തിൽ 36 റൺ നേടി. ആദ്യം ബാറ്റ് ചെയ്ത ഇംഗ്ലണ്ടിനായി ജോസ് ബട്ലർ (39 പന്തിൽ 59), മൊയീൻ അലി (16 പന്തിൽ 36), ലിയാം ലിവിങ്സ്റ്റൺ (23 പന്തിൽ 38) എന്നിവർ മികച്ച പ്രകടനം പുറത്തെടുത്തു. ലിവിങ്സ്റ്റൺ മൂന്ന് സിക്സർ പായിച്ചു. അതിൽ രണ്ടെണ്ണം സ്റ്റേഡിയത്തിന്റെ പുറത്തായിരുന്നു. മൂന്നാംമത്സരം ഇന്നാണ്.
