ഇളവുകൾ പ്രഖ്യാപിച്ച സാഹചര്യത്തിൽ കോഴിക്കോട് സിറ്റി പോലീസ് പരിധിയിലുള്ള എല്ലാ വ്യാപാര സ്ഥാപനങ്ങളും കൊവിഡ് പ്രോട്ടോക്കോൾ പാലിച്ച് മാത്രമേ പ്രവർത്തിക്കുവാൻ പാടുള്ളൂവെന്ന് കോഴിക്കോട് സിറ്റി പോലീസ് അറിയിച്ചു.
ഇളവുകൾ നിലവിൽ വന്ന സാഹചര്യത്തിൽ താഴെപ്പറയുന്ന നിയന്ത്രണങ്ങൾ കർശനമായി പാലിക്കേണ്ടതാണ്.
1) എല്ലാ കടകളും അവയുടെ വലുപ്പത്തിനനുസരിച്ച് സാമൂഹ്യ അകലം പാലിച്ച് മാത്രമേ ആളുകളെ പ്രവേശിപ്പിക്കുവാൻ പാടുള്ളൂ
2) സാമൂഹ്യ അകലം ഉറപ്പ് വരുത്തുന്നതിനായി മാർക്കിംഗ് നടത്തേണ്ടതാണ്
3) തിരക്ക് നിയന്ത്രിക്കുന്നതിനായി ടോക്കൺ സംവിധാനം ഏർപ്പെടുത്തേണ്ടതാണ്
4) കടകളിൽ ആളുകൾ കൂട്ടമായി എത്തുന്ന വേളയിൽ പരിമിതമായ ആളുകളെ പ്രവേശിപ്പിച്ചശേഷം ഷട്ടർ പകുതി താഴ്ത്തി വെക്കേണ്ടതും, ഉള്ളിലുള്ള ആളുകൾ പുറത്തിറങ്ങുന്ന മുറക്ക് മാത്രമേ അടുത്തയാളുകളെ പ്രവേശിപ്പിക്കുവാനും പാടുള്ളൂ.
നിയന്ത്രണങ്ങൾ പാലിക്കാത്ത വ്യാപാര സ്ഥാപനങ്ങൾ അടച്ചുപൂട്ടുന്നതടക്കമുള്ള ശക്തമായ നടപടി സ്വീകരിക്കുന്നതാണെന്നും കോഴിക്കോട് സിറ്റി പോലീസ് അറിയിച്ചു.
അതേസമയം ഇന്ന് മിഠായി തെരുവിൽ നിന്ന് പോലീസ് വഴിയോര കച്ചവടക്കാരെ ഒഴിപ്പിച്ചെന്ന വാർത്തകളും പുറത്ത് വന്നിരുന്നു. തിരക്ക് നിയന്ത്രിക്കുന്നതിന്റെ ഭാഗമായിട്ടായിരുന്നു നടപടി. വഴിയോരത്തുള്ള കടകൾ തുറന്നാലും നിശ്ചിത സമയത്തിനുള്ളിൽ കട അടയ്ക്കാത്തവർക്കെതിരെയും നടപടി സ്വീകരിക്കുമെന്ന് സിറ്റി പോലീസ് കമ്മീഷണർ അറിയിച്ചിരുന്നു.
