കൊച്ചി: ചുള്ളിക്കണ്ടത്ത് പശുക്കൾക്ക് നേരെ തുടർച്ചയായി ആസിഡ് ആക്രമണം നടത്തിയ പ്രതികളെ എത്രയും പെട്ടന്ന് കണ്ടുപിടിച്ച് നിയമത്തിന് മുന്നിൽ കൊണ്ടുവരാൻ പോലീസിന് നിർദ്ദേശം നൽകുമെന്ന് മന്ത്രി ജെ ചിഞ്ചുറാണി. കവളങ്ങാട് പഞ്ചായത്തിലെ ചുള്ളിക്കണ്ടത്ത് പശുക്കൾക്ക് നേരെ തുടർച്ചയായി ആസിഡ് ആക്രമണം നടത്തുന്ന വാർത്ത മാതൃഭൂമി ഡോട്ട് കോം പ്രസിദ്ധീകരിച്ചിരുന്നു. തുടർന്നാണ് മന്ത്രിയുടെ ഇടപെടൽ. മൃഗങ്ങൾക്കെതിരായ അതിക്രമങ്ങളിൽ കുറ്റക്കാരായവർക്കെതിരേ ശക്തമായ നടപടി സ്വീകരിക്കുമെന്നും മന്ത്രി പറഞ്ഞു.
പശുക്കൾക്ക് നേരെ തുടർച്ചയായി ആസിഡ് ആക്രമണം നടത്തുന്നതായി പരാതിയൊന്നും ലഭിച്ചിട്ടില്ല. വാർത്ത കണ്ടതിനെ തുടർന്നാണ് കഴിഞ്ഞ ഒരു വർഷത്തോളമായി ഇത്തരമൊരു ക്രൂരത നടക്കുന്ന കാര്യം അറിഞ്ഞത്. ഇത് മൃഗങ്ങളോട് കാണിക്കുന്ന ക്രൂരതയാണ്. മാനസിക വൈകല്യമുള്ളവരാണ് ഇത്തരത്തിലുള്ള കൃത്യങ്ങൾ ചെയ്യുന്നത്. അവർക്കെതിരേ കൃത്യമായി നടപടി സ്വീകരിക്കും. പശുക്കളുടെ മേൽ ആസിഡ് ആക്രമണം നടക്കുന്ന സംഭവത്തിൽ എത്രയും പെട്ടന്ന് കുറ്റക്കാരെ കണ്ടെത്താൻ പോലീസിന് നിർദ്ദേശം നൽകുമെന്നും മന്ത്രി പറഞ്ഞു.
അതേസമയം മൃഗങ്ങളോടുള്ള ക്രൂരതകൾ റിപ്പോർട്ട് ചെയ്യുന്നതിനും അതിൽ അന്വേഷണം നടത്തി കുറ്റക്കാരെ കണ്ടെത്തുന്നതിനുമായി അടിയന്തരമായി ബോർഡ് രൂപീകരിക്കാനുള്ള നടപടികൾ സ്വീകരിച്ചിട്ടുണ്ട്. അതിന്റെ അംഗീകാരത്തിനു വേണ്ടിയുള്ള നടപടിക്രമങ്ങൾ പൂർത്തിയാക്കുകയാണ്. അംഗീകാരം ലഭിച്ചാൽ അടിയന്തരമായി യോഗം കൂടി മൃഗങ്ങൾക്ക് നേരെ ഇത്തരത്തിലുണ്ടാകുന്ന അതിക്രമങ്ങളിൽ കുറ്റക്കാരെ നിയമത്തിന് മുന്നിൽ കൊണ്ടുവരുമെന്നും മന്ത്രി പറഞ്ഞു. അതാത് പ്രദേശങ്ങളിൽ നിന്നുമുള്ള പരാതികൾ ശേഖരിച്ച് പോലീസിന്റെ സഹായത്തോടുകൂടി പ്രതികളെ കണ്ടെത്തിയായിരിക്കും നടപടി സ്വീകരിക്കുകയെന്നും മന്ത്രി പറഞ്ഞു.
ഒന്നര വർഷത്തിനിടെ കവളങ്ങാട് പഞ്ചായത്തിലെ ചുള്ളിക്കണ്ടത്ത് 12 പശുക്കളാണ്ആസിഡ് ആക്രണണത്തിന് ഇരയായത്. റബ്ബർ പാൽ ഉറയിടുന്ന ഫോർമിക്ക് ആസിഡാണ് പശുക്കളുടെ ദേഹത്ത് കോരിയൊഴിച്ചിരിക്കുന്നത്. തൊലിപൊളിഞ്ഞ് മാംസം പുറത്തേക്ക് തള്ളി വ്രണമായി മാറിയ അവസ്ഥയിലാണ് മിക്ക പശുക്കളും. മുറിവുകളുമായി മാസങ്ങളോളം ചികിത്സ നടത്തി ഭേദപ്പെടുത്തിയിടുത്ത പശുക്കൾക്ക് നേരേ വീണ്ടും ആസിഡ് ആക്രമണം നടത്തുന്നുണ്ട്.
Content Highlights:Acid attack against cows immediate action will be taken against the culprits says minister
