കുറച്ചു നാളുകളായി കേരള രാഷ്ട്രീയത്തിലെ ചൂടൻ ചർച്ചകൾക്ക് വിഷയമായ കൊടകര കുഴൽപ്പണ കേസിൽ ബി.ജെ.പി നേതാക്കൾ പ്രതികളല്ലെന്ന് കാണിച്ച് പോലീസ് സമര്‍പ്പിച്ച പുതിയ കുറ്റപത്രം വിവാദമായിക്കഴിഞ്ഞു.
സാക്ഷിപ്പട്ടികയിലും ബിജെപി പേരുകളില്ലെന്നതും ഇതിനോടകം വിവാദമായിട്ടുണ്ട്. ബി.ജെ.പി സംസ്ഥാന അധ്യക്ഷൻ കെ സുരേന്ദ്രൻ അടക്കം ഉണ്ടായിരുന്ന പ്രതിപ്പട്ടികയിലാണ് ഇപ്പോൾ പോലീസിന്‍റെ യു-ടേൺ. ഇരിങ്ങാലക്കുട കോടതിയിലാണ് ഇത് സംബന്ധിച്ച കുറ്റപത്രം സമർപ്പിക്കുക. പിന്നാലെ കസ്റ്റംസ് കമ്മീഷണർ സുമിത് കുമാറിനെ സ്ഥലം മാറ്റിയ നടപടിയിൽ വിഷയത്തിൽ മുഖ്യമന്ത്രി പിണറായി വിജയൻ ഇരട്ടത്താപ്പ് കളിക്കുന്നു എന്ന ആരോപണവുമായാണ് പ്രതിപക്ഷം രംഗത്തെത്തി.
കഴിഞ്ഞ ഏപ്രിൽ മൂന്നിന്, കൃത്യമായി പറഞ്ഞാൽ നിയമസഭാ തെരഞ്ഞെടുപ്പിന് മൂന്ന് ദിവസം മുന്‍പ് തൃശ്ശൂർ കൊടകരയിൽ ദേശിയ പാതയിൽ വെച്ച് കാറപകടമുണ്ടാക്കി 25 ലക്ഷം രൂപ കവർന്നു എന്ന പരാതിയുടെ അടിസ്ഥാനത്തിൽ തുടങ്ങിയ അന്വേഷണത്തിൽ പക്ഷേ നഷ്ടപ്പെട്ടത് 3.5 കോടിയിലേറെ രൂപയാണെന്ന കണ്ടത്തലോടെയാണ് കേസിന്റെ സ്വഭാവം തന്നെ മാറുന്നത്. ഇതിൽ ഒന്നര കോടിയോളം പിന്നീട് കണ്ടെത്തുകയും ചെയ്തു.
പിന്നാലെ കേസിലെ പരാതിക്കാരനായ സുന്ദരരാജനും കെ സുരേന്ദ്രനും തമ്മിലുള്ള ഫോൺ സംഭാഷണം പുറത്തായത് കേരളത്തെ ഒന്നടങ്കം ഞെട്ടിക്കുകയും ചെയ്തു. ഈ പണം തെരഞ്ഞെടുപ്പ് പ്രചാരണത്തിനായി ബിജെപി കേരളത്തിന് പുറത്ത് നിന്ന് കൊണ്ടുവന്നതാണെന്ന് പോലീസ് മുൻപ് കോടതിയിൽ നൽകിയ റിപ്പോർട്ടിൽ പറഞ്ഞിരുന്നു. കേസിൽ നിഗൂഢമായ ഒട്ടേറെ കാര്യങ്ങൾ ഇനിയും കണ്ടെത്താനുണ്ടെന്നും ദുരൂഹത വ്യക്തമാണെന്നും രണ്ട് ദിവസം മുന്നേ പ്രതികളുടെ ജാമ്യാപേക്ഷ തള്ളിക്കൊണ്ടുള്ള ഉത്തരവിൽ ഹൈക്കോടതി നിരീക്ഷിക്കുകയും ചെയ്തിരുന്നു.
ഇപ്പോൾ വന്ന പുതിയ കുറ്റപത്രത്തെക്കുറിച്ച് പോലീസ് ഭാഷ്യം ഇങ്ങനെ – “ഇതൊരു കവർച്ചാ കേസ് മാത്രമാണ്, അങ്ങനെയാണ് അന്വേഷണം നീക്കുന്നതും. കേസിൽ ആകെയുള്ള 22 പ്രതികൾക്കെതിരെ 24 കുറ്റപ്പത്രം സമർപ്പിക്കും” എന്നാണ്
പണത്തിന്‍റെ ഉറവിടവുമായി ബന്ധപ്പെട്ട് ബിജെപി നേതാക്കൾക്ക് പങ്കുണ്ടെന്ന് കുറ്റപത്രത്തിൽ പറയുന്നുണ്ട്. നഷ്ടപ്പെട്ട പണത്തിൽ പകുതിയിലധികവും പ്രതികൾ തന്നെ ഉപയോഗിച്ചതിനാൽ വീണ്ടെടുക്കുക ദുഷ്കരമാകുമായിരിക്കും. അതിനാൽ ഇത് അന്വേഷിക്കാനുള്ള അധികാരം ഇഡിക്ക് മാത്രമാണെന്നും അവരുടെ അന്വേഷണത്തിന് ശേഷം മാത്രമായിരിക്കും കേസിൽ കെ സുരേന്ദ്രൻ അടക്കമുള്ള ബിജെപി നേതാക്കൾ ഉൾപ്പെട്ടിട്ടുണ്ടോ എന്ന കാര്യത്തിൽ അന്തിമമായ തീരുമാനമുണ്ടാകൂ എന്നും പോലീസ് പറയുന്നു.
എന്നാൽ കേസ് ഇഡി ഏറ്റെടുക്കുമോ എന്ന കാര്യത്തിൽ വ്യക്തതയില്ല. നേരത്തേ, കേസിൽ എൻഫോഴ്സ്മെന്‍റ് അന്വേഷണത്തിന്‍റെ സാധ്യതകൾ കാണിച്ച് ആഴ്‌ചകൾക്കു മുമ്പേ തന്നെ സംസ്ഥാന പൊലീസ് കത്തു നൽകിയിരുന്നതാണ്. പിന്നീട് ബിജെപി സംസ്ഥാന അധ്യക്ഷൻ എന്നിവരുൾപ്പെടെ ഉള്ളവർക്കെതിരെ അന്വേഷണം വന്നപ്പോൾ എൻഫോഴ്സ്മെന്‍റ് അന്ന് പിൻവലിയുകയാണ് ഉണ്ടായത്
എന്നാൽ മുഖ്യമന്ത്രി പിണറായി വിജയന്‍റെ ഡൽഹി സന്ദർശനത്തിന് തൊട്ടുപിന്നാലെ ഉണ്ടായ ഈ സംഭവവികാസങ്ങളെ ഗൗരവത്തോടെയാണ് പ്രതിപക്ഷം നോക്കിക്കാണുന്നത്. ബി.ജെ.പി നേതാക്കളെ കേസിൽ നിന്ന് ഒഴിവാക്കിയതിന് പിന്നിൽ മുഖ്യമന്ത്രിയും ബിജെപിയും തമ്മിലുള്ള ഒത്തുകളിയാണെന്ന് കോൺഗ്രസ് ആരോപിക്കുന്നു. ജി.എസ്.ടി കമ്മീഷണറായി കസ്റ്റംസ് കമ്മീഷണർ സുമിത് കുമാറിനെ മഹാരാഷ്ട്രയിലേക്ക് മാറ്റിയതും എരിതീയിൽ എണ്ണയൊഴിച്ചതു പോലെയാക്കി കാര്യങ്ങൾ.
കേസിൽ ഇതേവരെ ബിജെപി സംസ്ഥാന സെക്രട്ടറി കെ സുരേന്ദ്രൻ, സംസ്ഥാന സംഘടനാ ജനറൽ സെക്രട്ടറി എം ഗണേഷ്, മേഖലാ ജനറൽ സെക്രട്ടറി വി. കാശിനാഥൻ, ബിജെപി ജില്ലാ പ്രസിഡന്റ് കെകെ അനീഷ് കുമാർ, യുവമോർച്ച മുൻ സംസ്ഥാന ട്രഷറർ സുനിൽ നായിക്, ജില്ലാ ജനറൽ സെക്രട്ടറിമാരായ കെഎസ് ഹരി, ഉല്ലാസ് ബാബു എന്നിങ്ങനെ 19 ബിജെപി നേതാക്കളെയാണ് സംഭവത്തിൽ പോലീസ് ചോദ്യം ചെയ്തത്
****
