കോഴിക്കോട്: ജില്ലയിൽ കോവിഡ് രോഗികളുടെ എണ്ണംവർദ്ധിക്കുന്ന സാഹചര്യത്തിൽ സർക്കാർ ഏർപ്പെടുത്തുന്ന നിയന്ത്രണങ്ങളോട് വ്യാപാരികൾ സഹകരിക്കണമെന്ന് കളക്ടർ എൻ. തേജ് ലോഹിത് റെഡ്ഡി അറിയിച്ചു. നിയന്ത്രണങ്ങൾ ലംഘിക്കുന്നവർക്കെതിരെ നടപടി സ്വീകരിക്കേണ്ടിവരുമെന്നും അദ്ദേഹം വ്യക്തമാക്കി. കളക്ടറേറ്റിൽ വിളിച്ചു ചേർത്ത വ്യാപാരി സംഘടന പ്രതിനിധി യോഗത്തിൽ സംസാരിക്കുകയായിരുന്നു അദ്ദേഹം.
കോവിഡ് മൂന്നാം തരംഗത്തിന്റെ തുടക്കത്തിലാണ് ജില്ല. കഴിഞ്ഞ മൂന്ന് ദിവസങ്ങളിലായിടെസ്റ്റ് പോസിറ്റിവിറ്റി റേറ്റ്(ടി.പി.ആർ.) കൂടുകയാണ്.ആക്ടീവ് കേസുകളുടെ എണ്ണത്തിൽ സംസ്ഥാനത്ത് രണ്ടാമതാണ് കോഴിക്കോട്.നിലവിൽ ജില്ലയിൽ 15,975 രോഗികളുണ്ട്. ഇതുവരെ 1415 പേർ മരണപ്പെട്ടു. ഈ സാഹചര്യത്തിൽ എല്ലാവിധ മുൻകരുതലുകളും എടുക്കേണ്ടതുണ്ട്. ശാസ്ത്രീയ വിശകലനങ്ങളുടെ അടിസ്ഥാനത്തിൽ കൈക്കൊളളുന്ന നിയന്ത്രണങ്ങൾ ലംഘിക്കുന്നവർക്കെതിരെ നടപടി സ്വീകരിക്കേണ്ടിവരും. ജില്ലാ കളക്ടർ വ്യക്തമാക്കി. വ്യാപാരി സംഘടനാ പ്രതിനിധികളുടെ ആവശ്യങ്ങൾ സർക്കാരിന്റെ ശ്രദ്ധയിൽ പെടുത്തുമെന്നും അദ്ദേഹം അറിയിച്ചു.
യോഗത്തിൽ ജില്ലാ പോലീസ് മേധാവി എ.വി. ജോർജ്, ഡെപ്യൂട്ടി കളക്ടർ എൻ. റംല, ഡി.എം.ഒ. ഡോ. വി. ജയശ്രീ, വ്യാപാര വ്യവസായി സമിതി സംസ്ഥാന പ്രസിഡന്റ് വി.കെ.സി. മമ്മദ് കോയ, വ്യാപാരി വ്യവസായി ഏകോപന സമിതി സംസ്ഥാന സെക്രട്ടറി കെ. സേതുമാധവൻ, മലബാർ ചേംബർ ഓഫ് കൊമേഴ്സ് പ്രതിനിധി ഹസീബ്, ഹോട്ടൽ ആൻഡ് റസ്റ്റോറന്റ് അസോസിയേഷൻ പ്രതിനിധി സന്തോഷ് കുമാർ യു.എസ്., എം.പി. അബ്ദുൽ ഗഫൂർ,മനാഫ് കാപ്പാട് തുടങ്ങിയവർ പങ്കെടുത്തു.
Content Highlights:Action will be Taken Against those who Violate Restrictions: Kozhikode Collector
