തിരുവനന്തപുരം: ചാരക്കേസിൽനമ്പി നാരായണനെ പ്രതിയാക്കിയത് ഐബിയും റോയും പറഞ്ഞിട്ടാണെന്ന് മുൻ ഡിജിപി സിബി മാത്യൂസ്. ചാരക്കേസ് ഗൂഡാലോചന സംബന്ധിച്ച അന്വേഷണത്തിനിടെ കോടതിയിൽ നൽകിയ മുൻകൂർ ജാമ്യാപേക്ഷയിലാണ് സിബി മാത്യൂസ് ഇക്കാര്യം പറയുന്നത്. തിരുവനന്തപുരം ജില്ലാ കോടതിയിലാണ് അദ്ദേഹം മുൻകൂർ ജാമ്യം തേടിയത്.
ചാരക്കേസ് സത്യമായിരുന്നുവെന്ന വാദത്തിൽ അദ്ദേഹം ഉറച്ചുനിന്നു. കോടതി എടുത്തുചോദിച്ചപ്പോഴും നിലപാട് ആവർത്തിച്ചു. ചാരക്കേസിൽ നമ്പി നാരായണനെ പ്രതിയാക്കിയത് ഐബിയും റോയും പറഞ്ഞിട്ടാണെന്നും ഹർജിയിൽ പറയുന്നു.1996-ൽ സിബിഐ നൽകിയ അന്തിമ റിപ്പോർട്ട് ചവറ്റുകുട്ടയിൽ കളയണമെന്നുംസിബിഐയുടെ പുതിയ അന്വേഷണം അനുഗ്രഹമായെന്നുംചാരക്കേസ് ശരിയായി അന്വേഷിച്ചാൽ സത്യം പുറത്തുവരുമെന്നും സിബി മാത്യൂസ് ജാമ്യഹർജിയിൽ ചൂണ്ടിക്കാട്ടി.
അതേസമയം, ജാമ്യാപേക്ഷയെ എതിർത്ത സിബിഐ അഭിഭാഷകൻ ജെയിൻ കമ്മറ്റി റിപ്പോർട്ട് സീൽ ചെയ്തകവറിൽ ജില്ലാ കോടതിക്കു നൽകാമെന്ന് അറിയിച്ചു.
രാജ്യസുരക്ഷയ്ക്കു വേണ്ടിയാണ് തങ്ങൾ ഔദ്യോഗിക കൃത്യനിർവഹണം നടത്തിയതെന്നും ഇതിൽ ഗൂഢാലോചനയില്ലെന്നും നേരത്തെ കോടതിയിൽ ഹാജരാക്കിയ രേഖയിൽ സിബി മാത്യൂസ് വ്യക്തമാക്കിയിരുന്നു.
ഐ.ബി. ഡെപ്യൂട്ടി ഡയറക്ടറായിരുന്ന ആർ.ബി. ശ്രീകുമാറിന്റെ നിർദേശപ്രകാരം സി.ഐ. എസ്. വിജയനാണ് മറിയം റഷീദയെയും ഫൗസിയ ഹസനെയും അറസ്റ്റുചെയ്തത്. തുടർന്നാണ്, ഐ.എസ്.ആർ.ഒ.യിലെ ഉന്നത ശാസ്ത്രജ്ഞരുമായി ഇവർക്ക് ബന്ധമുള്ള കാര്യം ബോധ്യമായത്.റഷ്യൻ ബഹിരാകാശ ഏജൻസിയുടെ പ്രതിനിധിയായ ബെംഗളൂരു സ്വദേശി ചന്ദ്രശേഖരനുമായും ഐ.എസ്.ആർ.ഒ. ശാസ്ത്രജ്ഞൻ ശശികുമാറുമായും ഫൗസിയ ഹസന് അടുത്തബന്ധമുണ്ടായിരുന്നു. ബെംഗളൂരുവിലെ ആർമി ക്ളബ്ബിൽ മറിയം റഷീദയും ഫൗസിയ ഹസനും സ്ക്വാഡ്രൻ ലീഡർ കെ.എൽ. ഭാസിനെ കണ്ടിരുന്നു. ഇക്കാര്യം അന്ന് ഒരു മാധ്യമവും റിപ്പോർട്ടുചെയ്തില്ല.മാധ്യമങ്ങൾ രമൺ ശ്രീവാസ്തവയുടെ പിറകിലായിരുന്നു. രമൺ ശ്രീവാസ്തവയെയും നമ്പി നാരായണനെയും അറസ്റ്റുചെയ്യാൻ നിർബന്ധിച്ചതും ഐ.ബി. ഉദ്യോഗസ്ഥരാണെന്നും സിബി മാത്യൂസ് വ്യക്തമാക്കിയിരുന്നു.
content highlights:isro espionage case conspiracy,siby mathews
