കോഴിക്കോട്> കൊയിലാണ്ടിയില് നിന്നും അക്രമി സംഘം തട്ടിക്കൊണ്ടുപോയ യുവാവിനെ വിട്ടയച്ചു. ഊരള്ളൂര് സ്വദേശി അഷ്റഫിനെ ഇന്നലെ അഞ്ചംഗ സായുധ സംഘമാണ് തട്ടിക്കൊണ്ടുപോയത്. അഷ്റഫിനെ പുലര്ച്ചയോടെ കുന്ദമംഗലത്ത് ഇറക്കിവിടുകയായിരുന്നു. തട്ടിക്കൊണ്ടുപോയ സംഘം ഇയാളെ ഉപദ്രവിച്ചതായി പൊലീസ് പറഞ്ഞു. കാല് ഒടിഞ്ഞ നിലയിലാണ്. ബ്ലേഡ്കൊണട് ദേഹത്ത് മുറിവേൽപ്പിച്ചിട്ടുണ്ട്
അഷ്റഫ് കുന്ദമംഗലത്തും മാവൂരിനും ഇടയ്ക്കുള്ള തടിമില്ലിനടുത്താണ് ഉണ്ടായിരുന്നതെന്നാണ് പൊലീസിന് ലഭിച്ച മൊഴി.
കൊടുവള്ളി കേന്ദ്രീകരിച്ചുള്ള സ്വര്ണക്കടത്ത് സംഘത്തില് അഷ്റഫ് കാരിയറായിരുന്നുവെന്ന് പൊലീസ് പറഞ്ഞു. മെയ് 26ന് റിയാദില് നിന്നെത്തിയ ഇയാള് സ്വര്ണം കൊണ്ടുവന്നിട്ടുണ്ടെന്നാണ് ലഭിച്ച വിവരം. എന്നാല് എത്തിച്ച സ്വര്ണം മറ്റാര്ക്കോ മറിച്ചുവിറ്റതോടെയാണ് ഇരുസംഘങ്ങളും തമ്മില് പ്രശ്നമുണ്ടായതും ഇയാളെ തട്ടിക്കൊണ്ടുപോയതും. വടകര ഡിവൈഎസ്പിയുടെ നേതൃത്വത്തില് പ്രത്യേക സംഘം രൂപീകരിച്ചാണ് അന്വേഷണം നടക്കുന്നത്.
അഷ്റഫിന്റെ സഹോദരന് നല്കിയ പരാതിയിലാണ് പൊലീസ് അന്വേഷണം തുടങ്ങിയത്.
