കേരളത്തിൽ അധികാരത്തുടർച്ച നേടിയ എൽഡിഎഫ് സർക്കാരിനെ മോദി അനുമോദിച്ചു. ആദ്യതവണ മുഖ്യമന്ത്രിയായെത്തിയപ്പോൾ ഗെയിൽ പൈപ്പ് ലൈൻ പദ്ധതി മുടങ്ങി കിടക്കുന്നകാര്യം പ്രധാനമന്ത്രി ചൂണ്ടിക്കാട്ടിയിരുന്നു. അത് പൂർത്തിയായ കാര്യം ഇത്തവണ സംസാരിച്ചെന്നും ഇക്കാര്യത്തിൽ അദ്ദേഹം അഭിനന്ദനം അറിയിച്ചെന്നും പിണറായി പറഞ്ഞു.
കേരളത്തിന്‍റെ വികസനത്തിനായി എന്ത് സഹായവും നൽകാമെന്നും അദ്ദേഹം ഉറപ്പ് നൽകി. വികസനകാര്യങ്ങളിൽ ഏകതാ മനോഭാവത്തോടെ മുന്നോട്ട് പോകേണ്ടതിന്‍റെ പ്രാധാന്യവും അദ്ദേഹം എടുത്തു പറഞ്ഞു. തങ്ങളുടെ സുപ്രധാനമായ വികസന പദ്ധതികൾ പ്രധാനമന്ത്രിയുടെ ശ്രദ്ധയിൽപ്പെടുത്തി. സില്‍വൈര്‍ ലൈന്‍ പദ്ധതി. സെമി ഹൈസ്പീഡ് പദ്ധതി തുടങ്ങിയവ ശ്രദ്ധയിൽപ്പെടുത്തിയപ്പോൾ സിൽവർ ലൈൻ സെമി ഹൈ സ്പീഡ് റെയിൽവേ പദ്ധതിയെക്കുറിച്ച് വിശദമായി പ്രധാനമന്ത്രി ചോദിച്ചറിഞ്ഞു.
കേരളത്തിലെ കൊവിഡ് സാഹചര്യത്തെക്കുറിച്ചും വിശദമായി പ്രധാനമന്ത്രിയുമായി ചർച്ച നടത്തി. സംസ്ഥാനം സ്വീകരിച്ച കൊവിഡ് പ്രതിരോധ നടപടികളെക്കുറിച്ച് പ്രധാനമന്ത്രിയെ ധരിപ്പിച്ചെന്നും മുഖ്യമന്ത്രി പറഞ്ഞു. ഈ മാസം അറുപത് ലക്ഷം ഡോസ് വാക്സിൻ ആവശ്യമുണ്ടെന്ന കാര്യവും അദ്ദേഹത്തെ അറിയിച്ചു. ഇതേക്കാര്യം നേരത്തെയും ആരോഗ്യമന്ത്രാലയത്തെ അറിയിച്ചതാണ്. ഈ മാസം മാത്രം 25 ലക്ഷം ഡോസ് വാക്സിൻ സെക്കൻഡ് ഡോസ് മാത്രമായി നൽകേണ്ടതുണ്ട്.
കേരളത്തിന്‍റെ ദീ‍ർഘകാല ആവശ്യമായ എയിംസ് ഉടനെ അനുവദിക്കണമെന്നും പ്രധാനമന്ത്രിയോട് ആവശ്യപ്പെട്ടിട്ടുണ്ടെന്നും മുഖ്യമന്ത്രി വാർത്താ സമ്മേളനത്തിൽ പറഞ്ഞു. ഇക്കാര്യത്തിൽ അനുകൂലമായ പ്രതികരണമാണ് പ്രധാനമന്ത്രിയുടെ ഭാഗത്ത് നിന്നുണ്ടായതെന്നും അദ്ദേഹം പറഞ്ഞു. അങ്കമാലി – ശബരി റെയിൽപാത വിഷയവും സംസാരിച്ചെന്നും മുഖ്യമന്ത്രി വ്യക്തമാക്കി.
