തൃശൂർ > കൊടകര ബിജെപി കുഴൽപ്പണക്കേസിൽ ബിജെപി സംസ്ഥാന പ്രസിഡന്റ് കെ സുരേന്ദ്രനെ ബുധനാഴ്ച ചോദ്യം ചെയ്യും. തൃശൂർ പൊലീസ് ക്ലബിൽ ബുധനാഴ്ച രാവിലെ പത്തിനകം ഹാജരാവാൻ ആവശ്യപ്പെട്ട് പ്രത്യേക അന്വേഷകസംഘം സുരേന്ദ്രനോട് വീണ്ടും നോട്ടീസ് അയച്ചിരുന്നു. ചോദ്യം ചെയ്യലിന് ഹാജരാവാൻ ആവശ്യപ്പെട്ട് ജൂലൈ രണ്ടിന് നോട്ടീസയച്ചെങ്കിലും സുരേന്ദ്രൻ ഒഴിഞ്ഞുമാറിയിരുന്നു. ചേരിപ്പോരിനെതുടർന്ന് ബിജെപിക്കുള്ളിൽനിന്ന് തന്നെ സമ്മർദമുയർന്നതോടെ സുര്രേന്ദൻ ഹാജരാവുമെന്നാണ് സൂചന.
നിയമസഭാ തെരഞ്ഞെടുപ്പിൽ കർണാടകയിൽ നിന്ന് ഇറക്കിയ കേരളത്തിൽ വിതരണം ചെയ്യുന്ന കുഴൽപ്പണമാണ് കവർച്ച ചെയ്യപ്പെട്ടതെന്ന് അന്വേഷകസംഘത്തിന് വ്യക്തമായി. സംഭവത്തിൽ സുരേന്ദ്രന് നിർണായക പങ്കുണ്ടെന്നാണ് അന്വേഷക സംഘത്തിന്റെ നിഗമനം. സംഘടനാ സെക്രട്ടറി എം ഗണേശൻ, സംസ്ഥാന ഓഫീസ് സെക്രട്ടറി ജി ഗിരീഷ് എന്നിവരുടെ നിർദേശപ്രകാരം ധർമരാജൻ വഴി ആലപ്പുഴ ജില്ലാ ട്രഷറർ കെ ജി കർത്തക്ക് എത്തിക്കാനുള്ള പണമാണ് ഏപ്രിൽ മൂന്നിന് കൊടകരയിൽ കവർച്ച ചെയ്യപ്പെട്ടത്. കവർച്ച നടന്ന ദിവസം അർധരാത്രി ധർമരാജൻ വിളിച്ച ഫോൺ കോളുകളിൽ കെ സുരേന്ദ്രന്റെ നമ്പറുമുണ്ട്. ബിജെപി ആലപ്പുഴ ജില്ലാ ട്രഷറർ കെ ജി കർത്തയെ ചോദ്യം ചെയ്തതിൽ നിന്നാണ് സുരേന്ദ്രനെതിരെ നിർണായക മൊഴി ലഭിച്ചത്. കുഴൽപ്പണക്കടത്തുകാരനായ ധർമരാജന്റെ മൊഴിയും സുരേന്ദ്രനെതിരാണ്.
ബിജെപിയുടെ സംഘടനാ സെക്രട്ടറി മുതൽ തൃശൂർ ജില്ലാ ഓഫീസ് സെക്രട്ടറിമാരെയും കെ സുരേന്ദ്രന്റെ ഡ്രൈവറെയും സെക്രട്ടറിയെയും ഉൾപ്പെടെ ചോദ്യം ചെയ്തിരുന്നു. തുടർന്നാണ് സുരേന്ദ്രനെയും ചോദ്യം ചെയ്യാൻ വിളിപ്പിക്കുന്നത്.
