കൊച്ചി > കേരളം വ്യവസായികള്ക്ക് അനുകൂലമല്ലെന്ന് വാദിക്കുന്ന കിറ്റ്കെസ് എംഡി സാബു ജേക്കബ് ഒരുവര്ഷം മുന്പ് നടന്ന അസന്ഡ് വ്യവസായ നിക്ഷേപ സംഗമത്തില് നടത്തിയ പ്രസംഗം സോഷ്യല് മീഡിയയില് വൈറലാകുന്നു. വ്യവസായത്തിന് വളരെ നല്ല സാഹചര്യമാണ് കേരളത്തിലുള്ളതെന്നും ഇതുപോലൊരു കാലാവസ്ഥ താന് അനുഭവിച്ചിട്ടില്ലെന്നും സാബു പറഞ്ഞിരുന്നു. കഴിഞ്ഞ മൂന്ന്, നാല് വര്ഷമായിട്ട് കേരളത്തില് ഒരുപാട് കാര്യങ്ങള് ഇന്വെസ്റ്റ് ചെയ്യാന് സാധിച്ചു. പലപ്പോഴും ബിസിനസ് ഇനി മുന്നോട്ട് പോകണ്ട, ഇത്രേം മതി എന്ന് വിചാരിച്ചിരുന്ന ആളാണ് താന്. അസന്ഡിലെ മുഖ്യമന്ത്രിയുടെ പ്രഖ്യാപനം കേരളത്തില് കൂടുതല് നിക്ഷേപം നടത്താന് പ്രേരിപ്പിക്കുന്നതാണെന്നും സാബു അന്ന് പറഞ്ഞിരുന്നു.
സാബു ജേക്കബ് അന്ന് പറഞ്ഞത്
“ജീവിതത്തില് എല്ലാ മേഖലകളിലും പ്രശ്നങ്ങള് ഉണ്ട്. കുടുംബത്തിലലും മറ്റ് എല്ലാ മേഖലകളിലും പ്രശ്നങ്ങള് ഉണ്ട്. അതുപോലെ, വ്യവസായത്തിലും പ്രശ്നങ്ങള് ഉണ്ട്. നമ്മള് ഇവിടെ പ്രശ്നങ്ങളെ മാത്രം പറയുകയാണ്. പക്ഷെ, അത് അതിജീവിക്കാന് നമുക്ക് സാധിക്കണം.
പതിമൂന്നാം വയസിലാണ് ഞാന് ബിസിനസിലേക്ക് ഇറങ്ങുന്നത്. ഇത്രയും വര്ഷത്തിനിടയില് നല്ല കാലാവസ്ഥ, കഴിഞ്ഞ മൂന്ന്, നാല് വര്ഷമായിട്ട് നമ്മുടെ കേരളത്തില് ഒരുപാട് കാര്യങ്ങള് ഇന്വെസ്റ്റ് ചെയ്യാന് സാധിച്ചു. പലപ്പോഴും ബിസിനസ് ഇനി മുന്നോട്ട് പോകണ്ട, ഇത്രേം മതി എന്ന് വിചാരിച്ചിരുന്ന ആളാണ്. ഇന്നിപ്പോള് മുഖ്യമന്ത്രിയുടെ പ്രഖ്യാപനം ഒക്കെ കേട്ടപ്പോള് കൂടുതല് ഇന്വെസ്റ്റ് ചെയ്യാന് എന്നെ പ്രേരിപ്പിക്കുന്നുണ്ട്. തീര്ച്ചയായും വളരെ നല്ല സാഹചര്യമാണ് ഇപ്പോള് ഉള്ളത്. “
