‘ലോക്ക് ഡൗൺ നീട്ടാനാവില്ല, ഘട്ടം ഘട്ടമായി ഇളവുകൾ നടപ്പിലാക്കും’: മുഖ്യമന്ത്രി

തിരുവനന്തപുരം: സംസ്ഥാനത്ത് നിയന്ത്രണങ്ങൾ അനന്തമായി നീട്ടാനാവില്ലെന്ന് മുഖ്യമന്ത്രി . കൊവിഡ് കേസുകളിൽ കാര്യമായ കുറവ് സംഭവിച്ചിട്ടില്ലെങ്കിലും സാധാരണ നിലയിലേക്ക് സംസ്ഥാനം എത്തേണ്ടതുണ്ട്. ഘട്ടം ഘട്ടമായി ഇളവുകൾ നടപ്പിലാക്കുകയാണെന്നും മുഖ്യമന്ത്രി പറഞ്ഞു.

ലോക്ക് ഡൗൺ ഇളവുകൾ ദുരുപയോഗം ചെയ്യുന്നത് അനുവദിക്കാനാകില്ല. കൊവിഡിൻ്റെ രണ്ടാം തരംഗത്തിൻ്റെ തിരിച്ചടി പല സംസ്ഥാനങ്ങളിലും കുറഞ്ഞെങ്കിലും കേരളത്തിൽ കൊവിഡ് കേസുകൾ കുറയാത്തതിൽ പലർക്കും ആശങ്കയുണ്ട്. എന്നാൽ അമിതമായി ഭയപ്പെടേണ്ട സാഹചര്യമില്ല. കാര്യങ്ങൾ നിയന്ത്രണത്തിലാണെന്നും കൊവിഡ് അവലോകന യോഗത്തിന് ശേഷം നടന്ന വാർത്താസമ്മേളനത്തിൽ മുഖ്യമന്ത്രി പറഞ്ഞു.

ഡെൽറ്റ വകഭേദമാണ് രണ്ടാം തരംഗത്തിൽ കേരളത്തിലെത്തിയത്. മാർച്ച് മധ്യത്തിൽ മറ്റ് സംസ്ഥാനങ്ങളിൽ കൊവിഡിൻ്റെ രണ്ടാം ഘട്ടം ആരംഭിച്ചു. മേയ് മാസത്തിലാണ് കേരളത്തിൽ രണ്ടാം ഘട്ടം ആരംഭിച്ചത്. ടിപി ആർ 29 ശതമാനം ഉയരുകയും പ്രതിദിന രോഗികളുടെ എണ്ണം 40,000ത്തിലേക്ക് ഉയരുകയും ചെയ്തു. ടിപിആർ കുറഞ്ഞ് പത്ത് ശതമാനത്തിനടുത്ത് മാറ്റമില്ലാതെ ദിവസങ്ങളായി നിൽക്കുന്നുവെന്നും സർക്കാർ വ്യക്തമാക്കി.

അതേസമയം, കേരളത്തിൽ ഇന്ന് കേരളത്തില്‍ ഇന്ന് 14,087 പേര്‍ക്ക് കൊവിഡ് സ്ഥിരീകരിച്ചു. 109 മരണങ്ങളാണ് കോവിഡ് മൂലമാണെന്ന് ഇന്ന് സ്ഥിരീകരിച്ചത്. ഇതോടെ ആകെ മരണം 14,489 ആയി. 1,15,226 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 29,22,921 പേര്‍ ഇതുവരെ കൊവിഡില്‍ നിന്നും മുക്തി നേടി. വിവിധ ജില്ലകളിലായി 3,84,493 പേരാണ് ഇപ്പോള്‍ നിരീക്ഷണത്തിലുള്ളത്. സംസ്ഥാനത്തെ ടെസ്റ്റ് പോസിറ്റിവിറ്റി നിരക്ക് 10.7 ആണ്.