പാലക്കാട്: കഠ്വയിലെ പെൺകുട്ടി ക്രൂരമായ പീഡനത്തിനിരയായി കൊല്ലപ്പെട്ടതിന് സമാനമായാണ് വണ്ടിപ്പെരിയാറിലെ പെൺകുട്ടി പീഡനത്തിനിരയായി കൊല്ലപ്പെട്ടതെന്ന് വി.ടി ബൽറാം. സംഭവം വയലൻസിന്റെ അങ്ങേയറ്റമാണെന്നും പ്രതിനാട്ടുകാർക്ക് മുന്നിൽ മനുഷ്യ സ്നേഹിയായ ഉത്തമസഖാവായി പ്രച്ഛന്നവേഷമാടുകയായിരുന്നുവെന്നും വി.ടി ബൽറാം കുറ്റപ്പെടുത്തുന്നു. ഫെയ്സ്ബുക്ക് പോസ്റ്റിലൂടെയായിരുന്നു വി.ടി ബൽറാമിന്റെ പ്രതികരണം. വാളയാർ കേസുപോലെ വണ്ടിപ്പെരിയാറിലെ സംഭവവും അട്ടിമറിയ്ക്കപ്പെടാമെന്ന ആശങ്കയും വി.ടി ബൽറാം പ്രകടിപ്പിച്ചു.
വിടി ബൽറാമിന്റെ ഫെയ്സ്ബുക്ക് പോസ്റ്റിന്റെ പൂർണരൂപം
ജമ്മു കശ്മീരിലെ കഠ്വയിലെ പിഞ്ചു കുഞ്ഞിന്റെ നേർക്കുണ്ടായ ക്രൂരമായ പീഡനക്കൊലപാതകത്തേപ്പോലെത്തന്നെ മനുഷ്യ മനസ്സാക്ഷിയെ ഞെട്ടിക്കുന്ന ഒരു വാർത്തയാണ് വണ്ടിപ്പെരിയാറിൽ നിന്ന് ഈ കേരളവും കേൾക്കാനിടവന്നിട്ടുള്ളത്. നിരന്തരമായ റേപ്പിനിരയാക്കപ്പെട്ട കുഞ്ഞ് അതിക്രൂരമായി കഴുത്തുഞെരിച്ച് കൊല്ലപ്പെടുകയായിരുന്നു.
കെട്ടിത്തൂക്കുന്നതിനിടയിൽ കണ്ണു തുറന്ന് കുഞ്ഞ് ജീവനുവേണ്ടി പിടയുമ്പോഴും ആ കൊലപാതകിയുടെ കൈ വിറക്കുന്നില്ല, മനസ്സ് മാറുന്നില്ല. വയലൻസിന്റെ അങ്ങേയറ്റമാണിത്. എന്നിട്ടും നാട്ടുകാർക്ക് മുന്നിൽ മനുഷ്യ സ്നേഹിയായ ഉത്തമ സഖാവായി പ്രച്ഛന്നവേഷമാടിയ അപകടകരമായ ക്രിമിനൽ ബുദ്ധി കൂടിയാണ് പ്രതിയുടേത്.
പ്രതിയുടെ കൃത്യമായ രാഷ്ട്രീയ ബന്ധം വാളയാറിലേത് പോലെ ഈ കേസും അട്ടിമറിക്കുന്നതിലേക്ക് നയിക്കപ്പെടരുത്.അതുറപ്പിക്കാൻ കേരളത്തിന് കഴിയണം.
Content Highlight: Vandiperiyar rape-murder case: VT Balram fb post
