കൊച്ചി: മദ്യശാലയ്ക്കു മുന്നിലെ തിരക്ക് സംബന്ധിച്ച് സംസ്ഥാന സർക്കാരിനോട് വിശദീകരണം ചോദിച്ച് ഹൈക്കോടതി. ഒരാഴ്ചയ്ക്കുള്ളിൽ വിശദീകരണം നൽകണമെന്നാണ് കോടതി ആവശ്യപ്പെട്ടിരിക്കുന്നത്. മഹാമാരിക്കാലത്ത് ബിവറേജിനു മുന്നിലെ തിരക്ക് കണ്ടില്ലെന്നും നടിക്കാൻ സാധിക്കില്ലെന്ന് കോടതി പറഞ്ഞു.
ബിവറേജുകൾക്കു മുന്നിലെ തിരക്ക് കുറയ്ക്കണമെന്ന് ആവശ്യപ്പെട്ട് സമർപ്പിച്ച ഹർജിയിലാണ് കോടതി സംസ്ഥാന സർക്കാരിന്റെ വിശദീകരണം ആവശ്യപ്പെട്ടിരിക്കുന്നത്. വിഷയത്തിൽ അടുത്ത ചൊവ്വാഴ്ചയ്ക്കുള്ളിൽ വിശദീകരണം നൽകണം. എക്സൈസ് കമ്മീഷ്ണറോട് ഹാജരാകാനും കോടതി നിർദ്ദേശിച്ചു. ഇപ്പോൾ നടക്കുന്നത് കൊവിഡ് മാനദണ്ഡങ്ങളുടെ ലംഘനമാണെന്നാണ് ഹർജിക്കാരന്റെ ആരോപണം.
കൊവിഡ് മാനദണ്ഡങ്ങൾ മദ്യശാലകൾക്കു മുന്നിൽ പാലിക്കുന്നില്ലെന്ന വാദം കോടതി ശരിവെച്ചു. ഇതുമായി ബന്ധപ്പെട്ട ഫോട്ടോകളും വീഡിയോകളും കോടതി പരിഗണിച്ചു. കൊവിഡ് വ്യാപനം രൂക്ഷമായിരിക്കെ മദ്യശാലയ്ക്കു മുന്നിൽ ഇളവ് പാടില്ലെന്നാണ് കോടതി വ്യക്തമാക്കിയിരിക്കുന്നത്.
