കണ്ണൂർ: സി.പി.എം. നേതാക്കളായ കാരായി ചന്ദ്രനും കാരായി ചന്ദ്രശേഖരനും മുഖ്യപ്രതികളായ തലശ്ശേരി ഫസൽ വധക്കേസിൽ തുടരന്വേഷണത്തിന് ഉത്തരവിട്ട ഹൈക്കോടതി വിധി സ്വാഗതം ചെയ്ത് പി. ജയരാജൻ. സ്വാഗതാർഹമായ വിധിയാണ് ഹൈക്കോടതി പുറപ്പെടുവിച്ചിരിക്കുന്നതെന്ന് അദ്ദേഹം പറഞ്ഞു. എങ്കിലും വൈകിയാണ് നീതി എത്തിയതെന്നും പി. ജയരാജൻ പറഞ്ഞു.
സി.ബി.ഐ. കൂട്ടിലിട്ട തത്തയായാണ് പ്രവർത്തിക്കുന്നതെന്നും അതിന്റെ ഭാഗമായാണ് പുതിയ തെളിവുകൾ വന്നിട്ടും തുടരന്വേഷണം നടത്തി യഥാർത്ഥ പ്രതികളായ ആർ.എസ്.എസുകാരെ ഉൾപ്പെടുത്താതിരിക്കാൻ സിബിഐ ശ്രമിച്ചതെന്നും അദ്ദേഹം ആരോപിച്ചു. ഇത് കേരളത്തെ സംബന്ധിച്ച് പുതിയ കാര്യമല്ലെന്നും അദ്ദേഹം പറഞ്ഞു.
ഹൈക്കോടതിയിൽ രണ്ടര വർഷം മുമ്പാണ് ഫസലിന്റെ സഹോദരൻ പെറ്റീഷനുമായി എത്തിയതെന്ന് പി. ജയരാജൻ പറഞ്ഞു. ഇപ്പോൾ പ്രതി ചേർത്തിരിക്കുന്ന കാരായി രാജൻ അടക്കമുള്ളവരല്ല ഇത് നടത്തിയതെന്നും ആർ.എസ്.എസുകാരാണെന്നും ചൂണ്ടിക്കാട്ടി തുടർ അന്വേഷണത്തിന് ഹർജി നൽകിയിരുന്നു. ഒന്നര വർഷത്തിന് ശേഷമാണ് ഹൈക്കോടതി ഇത്തരത്തിൽ ഒരു വിധി പുറപ്പെടുവിച്ചിരിക്കുന്നതെന്നും പി.ജയരാജൻ ചൂണ്ടിക്കാട്ടി.
ഫസലിന്റെ സഹോദരൻ അബ്ദുൾ സത്താർ സമർപ്പിച്ച ഹർജിയിലാണ് ഹൈക്കോടതി സി.ബി.ഐയുടെ തുടരന്വേഷണത്തിന് ഉത്തരവുണ്ടായിരിക്കുന്നത്. കേസിൽ അറസ്റ്റിലായിട്ടുള്ളത് യഥാർത്ഥ പ്രതികളല്ലെന്ന് ആരോപിച്ചാണ് ഫസലിന്റെ സഹോദരൻ കോടതിയെ സമീപിച്ചത്. ആർഎസ്എസ് പ്രവർത്തകനായ ചെമ്പ്ര സ്വദേശി സുബീഷ് നടത്തിയ വെളിപ്പെടുത്തലാണ് തുടരന്വേഷണ ഹർജിക്ക് കാരണമായത്.
Content Highlights: P. Jayarajan on Fazal murder case High Court orders
