കൊച്ചി
പാലാരിവട്ടം പാലം അഴിമതിക്കേസിൽ മുൻ മന്ത്രി വി കെ ഇബ്രാഹിംകുഞ്ഞ് ജാമ്യവ്യവസ്ഥയിൽ ഇളവുതേടി വീണ്ടും ഹൈക്കോടതിയെ സമീപിച്ചു. ഗുരുതര അസുഖങ്ങൾക്ക് ചികിത്സയിലായിരുന്ന ഇബ്രാഹിംകുഞ്ഞിന് എറണാകുളം ജില്ലവിട്ട് പുറത്തുപോകരുതെന്ന ഉപാധിയോടെയാണ് ഹൈക്കോടതി ജാമ്യം അനുവദിച്ചത്. ഈ വ്യവസ്ഥ നീക്കണമെന്നാണ് ഇബ്രാഹിംകുഞ്ഞിന്റെ പുതിയ ആവശ്യം.
അന്വേഷണം പൂർത്തിയായ കേസിൽ കുറ്റപത്രം സമർപ്പിച്ചെന്നും ഏഴരമാസമായി കോടതി നിർദേശം പാലിക്കുന്നുണ്ടെന്നും ഹർജിയിൽ പറയുന്നു. നിയമസഭാ തെരഞ്ഞെടുപ്പുകാലത്ത് ജാമ്യവ്യവസ്ഥയിൽ ഇളവുതേടി സമീപിച്ചെങ്കിലും ഹർജി ഹൈക്കോടതി തള്ളിയിരുന്നു. കേസിൽ അഞ്ചാംപ്രതിയാണ് ഇബ്രാഹിംകുഞ്ഞ്.
