എംഎൽഎയുമായി വിദ്യാർഥി നടത്തിയതെന്ന തരത്തിൽ പുറത്തുവന്ന ഫോൺ സംഭാഷണത്തിൽ മുകേഷ് തന്നെയാണോ ഉള്ളതെന്ന കാര്യം വ്യക്തമല്ല. ഇക്കാര്യത്തിൽ അദ്ദേഹം പ്രതികരണം നടത്താത്തതിനാൽ സമയം മലയാളത്തിന് സ്ഥിരീകരണം നടത്താനായിട്ടില്ല.
അത്യാവശ്യ കാര്യം പറയാൻ സുഹൃത്തിൻ്റെ കൈയിൽ നിന്നും നമ്പർ വാങ്ങിയാണ് വിളിക്കുന്നതെന്ന് വിദ്യാർഥി സംഭാഷണത്തിൽ ആദ്യം പറയുന്നുണ്ട്. മീറ്റിങിൽ ആണെന്നും എന്തിനാണ് ഇങ്ങനെ തുടർച്ചയായി വിളിക്കുന്നതെന്നും ചോദിച്ചതിന് പിന്നാലെയാണ് അത്യാവശ്യ കാര്യം പറയാനുണ്ടെന്ന് കുട്ടി എംഎൽഎയോട് പറഞ്ഞത്.
പാലക്കാട്ട് നിന്നും കൊല്ലം എംഎൽഎയെ ഫോണിൽ വിളിക്കേണ്ട ആവശ്യമില്ലെന്ന് വ്യക്തമാക്കിയ മുകേഷ് പാലക്കാട് എംഎല്‍എ എന്നൊരൊൾ ജീവനോടെ ഇല്ലേ എന്നും ചോദിക്കുന്നുണ്ട്. കൂട്ടുകാരനാണ് നമ്പർ നൽകിയതെന്ന പറഞ്ഞതോടെ മുകേഷ് കൂടുതൽ പ്രകോപിതനായി. “കൂട്ടുകാരൻ ആരാണെന്ന് നോക്കി അവരെ ചെവിക്കുറ്റി നോക്കി അടിക്കണം. അവൻ്റെ മണ്ഡലത്തിലെ എംഎൽഎയുടെ നമ്പർ വേറേതൊരു രാജ്യത്തെ എംഎല്‍എയുടെ നമ്പര്‍ തന്നിട്ട് എന്താ അവന്‍ പറഞ്ഞത്. സ്വന്തം എംഎൽഎയെ വിളിച്ചിട്ട് അവർ എന്ത് പറയുന്നു എന്ന് നോക്കിയിട്ടേ എന്നെ വിളിക്കാവൂ. സ്വന്തം എംഎൽഎ മരിച്ച് പോയത് പോലെയാണല്ലോ എന്നെ വിളിക്കുന്നത്. യോഗത്തിൽ ഇരിക്കുന്നതിനിടെയാണ് വിളിക്കുന്നത്, ആളുകൾ എന്നെ നോക്കി ചിരിക്കുവാ” – എന്നും പുറത്തുവന്ന ശബ്ദരേഖയിൽ പറയുന്നുണ്ട്.
സ്വന്തം എംഎല്‍എയെ വിളിക്കാതെ അയാളെ വെറും ബഫൂണ്‍ ആക്കീട്ട് വേറെ നാട്ടിലെ എംഎല്‍എയെ വിളിക്കുന്നത് തെറ്റല്ലേ എന്നും ശബ്ദരേഖയിൽ ചോദിക്കുന്നുണ്ട്. സംഭാഷണത്തിനിടെ കുട്ടി സോറി പറയുന്നുണ്ടെങ്കിലും സ്വന്തം എംഎൽഎ ആരാണെന്നറിയാമോ എന്ന് മുകേഷ് ചോദിക്കുന്നുണ്ട്. അറിയില്ലെന്ന് കുട്ടി പറഞ്ഞതോടെ സ്വന്തം എംഎല്‍എ ആരാന്ന് അറിയാത്ത പത്താം ക്ലാസില്‍ പഠിക്കുന്ന നീ ഒക്കെ എന്റെ മുന്നിലുണ്ടെങ്കില്‍ ചൂരല് വെച്ച് അടിച്ചേനെ എന്നും സംഭാഷണത്തിൽ പറയുന്നുണ്ട്.
