മൂന്ന് ദിവസത്തിനുള്ളിൽ വിട്ടുപോയ മരണങ്ങളെല്ലാം പട്ടികയിൽ ഉള്‍പ്പെടുത്തും. ഒറ്റപ്പെട്ട മരണങ്ങള്‍ വിട്ടുപോയാലും പരാതി നൽകാം നടപടിയുണ്ടാകും. മരണക്കണക്ക് ഒളിച്ചുവയ്ക്കില്ല, സുതാര്യത ഉറപ്പാക്കും ഇതിനായി പുതിയ സോഫ്റ്റ് വെയര്‍ തയ്യാറാക്കുമെന്നും മന്ത്രി മാധ്യമങ്ങളോട് പറഞ്ഞു.
ജൂണ്‍ 16ന് ശേഷമുള്ള മുഴുവന്‍ മരണങ്ങളും 24 മണിക്കൂറിനകം റിപ്പോര്‍ട്ട് ചെയ്യാൻ നിര്‍ദേശം നല്‍കിയിട്ടുണ്ട്. രേഖകളില്ലാത്ത കൊവിഡ് മരണങ്ങള്‍ കൂടി എണ്ണത്തില്‍ ഉള്‍പ്പെടുത്താനും ആവശ്യപ്പെട്ടു. വിവരങ്ങള്‍ ഓണ്‍ലൈന്‍ അപ്ഡേഷനാണ് നടത്തുന്നത്.
കൊവിഡ് ബാധിച്ച്‌ മരിച്ചയാളുടെ വിവരം അതുപോലെ തന്നെ രേഖപ്പെടുത്തണമെന്നാണ് ആരോഗ്യ വകുപ്പിന്റെ നിലപാടെന്നും വീണ ജോര്‍ജ് വ്യക്തമാക്കി.
കൊവിഡ് വന്ന് മരിച്ചവരുടെ പേരും വയസും സ്ഥലവും അടക്കമുള്ള വിവരങ്ങള്‍ സ്വകാര്യത മാനിച്ചുകൊണ്ട് ഇന്നലെ മുതൽ പ്രസിദ്ധികരീക്കുന്നുണ്ട്. 2020 ഡിസംബര്‍ മാസം വരെ അത് പ്രസിദ്ധികരിച്ചിരുന്നു. അതുകഴിഞ്ഞ് അതുണ്ടായില്ലെന്ന് ശ്രദ്ധയിൽ പെട്ടതോടെയാണ് നടപടികള്‍ സ്വീകരിച്ചത്.
അത് മാത്രമല്ല ജൂൺ 14ന് ആരോഗ്യ വകുപ്പ് ഒരു ഉത്തരവ് പ്രസിദ്ധീകരിച്ചു. മരണത്തിന്റെ റിപ്പോര്‍ട്ടിങ്ങ് അതാത് ആശുപത്രികളില്‍ നടത്തണമെന്നുള്ളതാണ് ആ ഉത്തരവിൽ പറയുന്നത്. അതിന് മുൻപ് തന്നെ ഒരു സോഫ്റ്റ്വെയര്‍ വികസിപ്പിക്കുകയും പരിശീലനം നൽകുകയും ചെയ്തതിന് ശേഷമാണ് സര്‍ക്കാര്‍ ഉത്തരവ് പുറപ്പെടുവിക്കുന്നത്. ജൂണ്‍ 16 മുതൽ ഓൺലൈൻ അപ്ഡേഷനാണ് നടക്കുന്നത്.
ആശുപത്രികളില്‍ ചികിത്സിക്കുന്ന ഡോക്ടര്‍ അല്ലെങ്കിൽ മെഡിക്കൽ സൂപ്രണ്ട് എഎന്നിവര്‍ മരണം സംബന്ധിച്ച വിവരങ്ങള്‍ അപ്ലോഡ് ചെയ്യണം. ഒരു കാലതാമസവുമില്ലാതെയാണ് നടപ്പാക്കുമെന്നും മന്ത്രി വ്യക്തമാക്കി.
