കൊച്ചി: രാമനാട്ടുകര-വെങ്ങളം ബൈപ്പാസിന്റെ വീതി കൂട്ടുന്നത് വൈകുന്നത് സംബന്ധിച്ചു വിളിച്ചു ചേർത്ത യോഗത്തിൽ പൊട്ടിത്തെറിച്ച് പൊതുമരാമത്ത് മന്ത്രി മുഹമ്മദ് റിയാസ്. റോഡിലെ കുഴി കാരണം തുടർച്ചയായി അപകടം സംഭവിക്കുന്ന പശ്ചാത്തലത്തിൽ ഉടൻ വിശദീകരണം നൽകിയില്ലെങ്കിൽ കരാർ റദ്ദാക്കുമെന്ന് മന്ത്രി പറഞ്ഞു. അപകടങ്ങൾ വർദ്ധിക്കുന്നതിനാൽ കരാറുകാരനെതിരെ നിയമ നടപടി സ്വീകരിക്കുന്നത് ആലോചിക്കുമെന്നും മന്ത്രി വ്യക്തമാക്കി.
2018 ലാണ് കോഴിക്കോട് ബൈപ്പാസ് പദ്ധതിയുടെ കരാർ ഉറപ്പിച്ചത്. എന്നാൽ കരാർ കമ്പനിയുമായി ബന്ധപ്പെട്ട പ്രശ്നങ്ങളെത്തുടർന്ന് നിർമ്മാണ പ്രവർത്തി മുന്നോട്ടു പോയില്ല. ഇതേത്തുടർന്നാണ് ഉന്നതതല യോഗം ചേർന്നത്. ഇതിനിടെയാണ് മന്ത്രി കടുത്ത ഭാഷയിൽ സംസാരിച്ചത്.
കമ്പനിയുമായുള്ള പ്രശ്നങ്ങളെത്തുടർന്ന് റോഡിന്റെ കുഴികൾ അടയ്ക്കാതിരിക്കുന്നത് ഒരുതരത്തിലും വെച്ചുപൊറുപ്പിക്കാൻ കഴിയില്ലെന്ന് മന്ത്രി പറഞ്ഞു. നിലവിലുള്ള പാതയിലെ കുഴിയടയ്ക്കാൻ 28 തവണ കത്ത് നൽകിയെങ്കിലും നടപടിയുണ്ടായില്ലെന്ന് മന്ത്രി വ്യക്തമാക്കി.
റോഡിന്റെ അറ്റകുറ്റപ്പണി അടിയന്തരമായി നടത്തണമെന്നാണ് മന്ത്രി നിർദ്ദേശിച്ചു. മുറിച്ചു മാറ്റേണ്ട മരങ്ങൾ ഉടൻ മുറിക്കണം. കരാറുമായി ബന്ധപ്പെട്ട കാര്യങ്ങൾ തീരുമാനിക്കാൻ ദേശീയ പാതാ അതോറിറ്റി ജീവനക്കാരെ അടക്കം പങ്കെടുപ്പിച്ച് തിരുവനന്തപുരത്ത് യോഗം ചേരും.
