കൊവിഡ് ബാധിച്ച് മരണമടഞ്ഞവരുടെ പേരുള്‍പ്പെടെയുള്ള വിവരങ്ങള്‍ പുറത്ത് വിടണമെന്ന ആവശ്യം പ്രതിപക്ഷം ശക്തമാക്കിയ സാഹചര്യത്തിലാണ് സർക്കാർ തീരുമാനം. ആരോഗ്യ വകുപ്പിന്റെ വെബ്‌സൈറ്റിലുള്ള ബുള്ളറ്റിനിലൂടെ ജില്ലയും വയസും മരണ തീയതിയും വച്ച് പ്രസിദ്ധീകരിച്ചു വരുന്നുണ്ടെന്ന് മന്ത്രി വ്യക്തമാക്കി. ഇനിമുതല്‍ പേരും വയസും സ്ഥലവും വച്ച് പ്രസിദ്ധീകരിക്കാനാണ് തീരുമാനിച്ചിരിക്കുന്നത്. ആരോഗ്യ വകുപ്പിന്റെ വെബ് സൈറ്റില്‍ നാളെ മുതല്‍ ഇത് പ്രസിദ്ധീകരിക്കുന്നതാണെന്നും കൂട്ടിച്ചേർത്തു.
മന്ത്രിയുടെ നേതൃത്വത്തിൽ നടന്ന യോഗത്തിലാണ് നിർണായക തീരുമാനം ഉണ്ടായത്. ഡോക്ടർമാർ സ്ഥിരീകരിച്ച കൊവിഡ് മരണങ്ങളാണ് പരസ്യപ്പെടുത്തുന്നത്. മരണവുമായി ബന്ധപ്പെട്ട പട്ടിക വിവാദത്തിലായതോടെ പേരുവിവരങ്ങൾ പുറത്തുവിടുന്ന നടപടിയിൽ നിന്നും 2020 ഡിസംബറിൽ സർക്കാർ പിന്മാറുകയായിരുന്നു.
പട്ടികയിൽ ഉൾപ്പെടാത്ത മരണങ്ങളെക്കുറിച്ച് ഒറ്റപ്പെട്ട പരാതികളുയർന്നാൽ പരിശോധിക്കുമെന്ന് മന്ത്രി വ്യക്തമാക്കിയിരുന്നു. കുടുംബങ്ങളുടെ സ്വകാര്യത പരിഗണിച്ചാകും പേരുകൾ പുറത്തുവിടുകയെന്നും ആരോഗ്യമന്ത്രി വീണാ ജോർജ് കൂട്ടിച്ചേർത്തിരുന്നു.
അതേസമയം, ആരോഗ്യവകുപ്പ് ഇന്ന് പുറത്തുവിട്ട കണക്കുകൾ പ്രകാരം കഴിഞ്ഞ ദിവസങ്ങളിലുണ്ടായ 146 മരണങ്ങൾ കൊവിഡ് മൂലമാണെന്ന് സ്ഥിരീകരിച്ചു. ഇതോടെ കേരളത്തിലെ ആകെ 13,505 ആയി. ടെസ്റ്റ് പോസിറ്റിവിറ്റി നിരക്ക് 10.11 ആണ്. 1,03,764 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 28,31,394 പേര്‍ ഇതുവരെ കൊവിഡില്‍ നിന്നും മുക്തി നേടി. സംസ്ഥാനത്തെ വിവിധ ജില്ലകളിലായി 3,91,753 പേരാണ് ഇപ്പോള്‍ നിരീക്ഷണത്തിലുള്ളത്.
